– 2016 jyly Qaraǵaıly aýdanyna sý tarttyq, – deıdi Nıkolaı Lýkın. – Jobany qolǵa alǵan uıymnyń ákimshisi retinde men bul qurylys-jóndeý jumystaryn merdiger mekeme durys oryndady dep aıta alamyn. Jan-jaqty teksergen mekemelerdiń talap-tilekteri túgeldeı eskerildi. Qaraǵaılyda eki aralyq stansany jaryqtandyrý jumystary ǵana qalyp otyr. Jáne Qarjaýbaıuly kóshesi men Pavlodar qalasyna shyǵatyn trassany asfalttaý jumystary da aldaǵy ýaqyttyń enshisinde.
Sonymen, «Nurly jol» baǵdarlamasy boıynsha 2017 jyly Semeıde Zaton aýmaǵyndaǵy qurylys-jóndeý jumystarynan bólek, Qaınar aýylynyń da sý júıelerin jóndeý máselesi tur. Jáne Vostochnyı kentine sý qubyryn tartý, Shúlbi kentindegi sý tazalaý qondyrǵysyn jóndeýden ótkizý kerek. Shúlbidegi sý tazalaý qondyrǵysynyń qurylys jumystary osydan bir aı buryn bastalsa kerek. Osy ýaqyt aralyǵynda jumysshylar jumys kestesinen birshama qalyp qoıypty. Aqshalaı shaqqanda bul keshigý 139 mln teńge bolyp shyǵady eken. Jáne Vostochnyı kentiniń de sý qubyryn jóndeý jumystary biraz keshigýde.
– Qaınar aýylyndaǵy kúrdeli jaǵdaı depýtattardyń basty nazarynda, – dedi «Nur Otan» partııasynyń Semeı qalalyq fılıaly tóraǵasynyń orynbasary Zýlfııa Jamalıtdınova, – depýtattardyń synǵa alǵandarynan mysalǵa keltirsek, aýylda sý qubyrlaryn tartý múlde durys qolǵa alynbapty. Qaınardyń kósheleri qazylǵan kúıi tur. Qazylǵan jerdiń uzyndyǵy 18 shaqyrymdy quraıdy. Tek 5,5 shaqyrymyna ǵana qubyrlar salynǵan. Bul jerde endi ne tehnıka, ne jumysshylar joq. Al adamdar qazylǵan kóshelerden abaılap júrýge májbúr, balalary ne ózderi shuńqyrǵa túsip ketip, jazym bolar dep qorqady.
– Bul úshin merdigerlerdi jaýapkershilikke shaqyramyz, – dedi Nıkolaı Lýkın, – eger biz kelisimshartty buzyp, qaıtadan tender jarııalasaq, Qaınar aýylynyń qubyry keler jyldyń sońynda da bitpeýi múmkin. Sebebi, osyndaı konkýrstardyń ótý merzimi uzaq. «Nurly jol» baǵdarlamasy boıynsha 2017 jylǵa jobalanǵan kóptegen qurylys jáne jóndeý jumystarynyń sozylyp ketip, ýaqtyly aıaqtalmaýyna sebep bolyp otyr. Biz bıyl konkýrs aıaqtalǵan soń, shilde aıynyń sońynda ǵana kelisimshartty bekittik. Sóıtip, merdigerler jumysqa jaz aýa kiristi.
– Biz Parlament Májilisiniń depýtattary aldynda memlekettik tapsyrys jáne satyp alý týraly zańdylyqtardyń konkýrstyq sharttaryn ózgertý týraly máseleni únemi aıtýdamyz, − dedi «Nur Otan» partııasynyń Semeı qalalyq fılıaly tóraǵasynyń orynbasary Zýlfııa Jamalıtdınova, – tipti keshe ǵana Májilis depýtaty Vasılıı Oleınık keldi. Taǵy da osy konkýrs merzimin nazarǵa alýdy usyndyq. Qazirgi ýaqyttaǵy memlekettik tapsyrys boıynsha ótetin konkýrs merzimderiniń edáýir sozylyp ketetindigine oraı bólingen qarjyǵa atqarylatyn jumystar keshigip jatady. Sóıtip, kóbine asyǵystyqpen atqarylǵan jumystardyń sapasy nashar bolyp shyǵyp, memleket qarjysy qaıtadan shyǵyn bolady.
Raýshan Nuǵmanbek
SEMEI