Alqa otyrysyna elimizdiń Ishki ister mınıstri Qalmuhambet Qasymov pen Reseı Federasııasynyń Ishki ister mınıstri Vladımır Kolokolsev, sondaı-aq, eki el mınıstrleriniń orynbasarlary, ortalyq apparattarynyń basshylary men TMD-daǵy Uıymdasqan qylmysqa jáne qylmystyń ózge de qaýipti túrlerine qarsy kúresti úılestirý jónindegi bıýrosynyń (BKBOP SNG) dırektory, osy bıýroǵa Qazaqstan Respýblıkasynan taǵaıyndalǵan ókil jáne jekelegen óńirlerdiń IID basshylary qatysty.
Alqaly keńeske qatysýshylar ótken jyly О́skemen qalasynda uıymdastyrylǵan Birlesken alqanyń ekinshi otyrysynda qabyldanǵan sheshimderdiń sátimen júzege asyrylyp jatqanyn, sonyń ishinde shekaralyq yntymaqtastyq aıtarlyqtaı arta túskenin atap ótti. Kezdesý barysynda Qazaqstan men Reseı ishki ister organdarynyń jetekshileri zańsyz esirtki aınalymyna qarsy kúres salasyndaǵy ekijaqty yntymaqtastyqty nyǵaıta túsýdiń baǵyttaryn jan-jaqty qarastyrdy. Nátıjesinde, osy másele boıynsha Qazaqstan men Reseıdiń shekaralas óńirlerinde, dálirek aıtqanda, Kaspıı teńizi aýmaǵynda jedel aldyn alý operasııalaryn ótkizý týraly sheshim qabyldandy.
Oǵan qosa, taraptar zańsyz kóshi-qonǵa qarsy is-qımyl salasyndaǵy yntymaqtastyqty damytý, ulttyq zańnamalardaǵy ózgerister týraly málimetterdi jedel almasý jáne osy baǵyttaǵy tıimdi jumys tájirıbesimen bólisýdi jandandyrý máseleleri boıynsha pikir almasty. Basqosý qorytyndysynda delegasııa basshylary zańsyz esirtki aınalymyna qarsy kúreste vedomstvoaralyq yntymaqtastyqty jetildirý, sondaı-aq, zańsyz kóshi-qonǵa qarsy is-qımyl salasyndaǵy ekijaqty ýaǵdalastyqty júzege asyrýǵa qatysty qujattarǵa qol qoıdy. Birlesken alqanyń aldaǵy jylǵa arnalǵan jumys jospary bekitilip, kelesi otyrysty Qazaqstanda ótkizý jóninde sheshim qabyldandy.
Nurlybek DOSYBAI,
«Egemen Qazaqstan»