Aıyppul tólep, qutylyp kete bere me?

Qylmystyq isti qaraǵan jýyr­daǵy sot otyrysynda prokýror Raýan Bostanov onyń bylyq-shylyqtaryn jipke tizgendeı sanamalap berip, 4 jylǵa bas bostandyǵynan aıyrýdy surady. Aıyptalýshy «Kazdorstroı» merdigerlik kompa­nııa­­synyń Petro­pavl tasjoly bo­ıyn­­da shybyq basyn syndyrmaǵan jumystaryn jal­ǵannyń jalpaǵyna shyǵarýdyń ornyna kóz juma qaraǵan. Onyń sońy qomaqty para alýmen aıaqtalǵan. 

Kúdiktiniń kinásin birden moıyndaýy sýdıany da, sotqa kelgenderdi de tańǵaldyrdy. Sóıtse, onyń asta­ryn­da «qýlyq» jatqany advokat­tyń sózinen keıin belgili boldy. Qorǵaýshy Dýlat О́mirálın A.Jan­kın­niń qylmysyn to­­lyq moıyn­daǵanyn, memleketke keltirgen shy­ǵyn­dardy túgel óteıtinin, taǵy bas­qa dáleldemelerdi alǵa tarta otyryp, Qylmystyq prosessýaldyq ko­deks­tiń 382-baby boıynsha isti qysqartylǵan tártippen qaraý, jazany aıyppul retinde taǵaıyndaý týraly ótinishin sýdıa Aıdarhan Janaqov qanaǵattandyryp, zańsyz jolmen qaltaǵa baspaq bolǵan qarajatty 60 ese ósimmen – 119 mıllıon teńge mólsherinde óteýge úkim shyǵardy. Dúnıe-múlki tárkilenip, memlekettik qyzmetten ómir boıy alastatyldy. Atalǵan soma bir aıdyń ishinde tólenýi tıis. Bolmasa alty aıǵa bólip tóleý úshin sotqa ótinish túsirý quqy bar.

Aıtpaǵymyz mynaý: sot­talý­­shy­nyń aǵaıyn-týystary úkim­di dý qol shapalaqpen qarsy alyp, sýdıanyń sózin úzýine, es­ker­tý jasaýyna týra kel­di. Olar­dyń qýanyshtaryna qara­ǵanda aıyp­talýshyǵa aıyppuldy tó­leý shybyn shaqqan qurly áser etpeıtin sııaqty. Ony qalaı ótemek degen saýal til ushyna oralady. Jeke esebinde júz mıllıondaǵan qarjysy bolsa, eki mıllıon úshin qylmystyq qadamǵa barýyna, abyroıyn aırandaı tógýine jol bolsyn? 

 Sýdıanyń sheshimin jurtshylyq­tyń árqıly qabyldaǵany ras. «Dánik­kennen qunyqqan jaman» dep atala­rymyz beker aıtpaǵan. Tábeti eshqa­shan toımaıtyn, arany ábden ashylǵan laýa­zymdy tulǵalardan memleket qarajatynyń eselep qaıtarylǵany du­rys-­aq. Alaıda, oǵan qosa jazalaryn abaqtyda óteý sharalaryn da qarastyrǵan jón. Ásirese, ha­lyq men­­shigine qyrǵıdaı tıetin ury-­qary­larǵa jazany qatańdatý álde­qaı­da áserli bolary anyq. Áıtpese, aıyp­pul tólep, qutylyp kete berse, erteń baıaǵy «ánine» baspasyna kim ke­pil? Mundaıda jazanyń tıimdiligi ja­ıynda áńgime qozǵaýdyń ózi artyq. Jelkildep ósip kele jatqan jas býyn qan­daı sabaq, tálim-tárbıe almaq? Taıaq­tyń eki ushy baryn eskermeı bolmaıdy.  Osyndaıda «ury túrmede otyrý kerek» degen qanatty sóz eriksiz eske oralady.  

О́mir ESQALI,

«Egemen Qazaqstan»

 Soltústik Qazaqstan oblysy