Sonaý sekseninshi jyldardyń ortasy bolatyn. On paıyzdan sál asatyn qazaǵy bar Selınograd qalasynda júreginiń namysy atoılaǵan ultjandy azamattar oblystyq gazet, radıo jáne televıdenıe sııaqty shyǵarmashylyq ujymdarǵa shoǵyrlanǵan bolatyn. Týra 1983 jyldyń jazynda sonaý Tashkent qalasynan bir azamat kelip, Selınograd oblystyq televıdenıesiniń dybys rejısseri bolyp qyzmetke ornalasty. Tashkent polıtehnıkalyq ınstıtýtynyń mehanıka fakýltetin bitirgen jas maman birden biliktilik tanytyp, televıdenıeniń tehnıkalaryn urshyqsha ıirip áketti. Selınograd oblystyq televıdenıesiniń tájirıbeli basshysy Vladımır Okýn Orynbaıdyń bul qabiletin birden baıqap, kóp uzamaı ony operatorlyq qyzmetke aýystyrdy. Mine, osy kezden bastap Orynbaı Balmurat selınogradtyq at tóbelindeı ultjandy azamattardyń qatarynan tabyldy.
Jeti jyldan astam oblystyq televıdenıede jemisti jumys atqaryp, Orekeń 1991 jyly alǵashqyda qalalyq «Aqmola aqıqaty», keıinnen Aqmola oblystyq «Arqa ajary» gazetine fototilshi bolyp qyzmetke aýysty. Oblystyq gazettiń fototilshisi degen – óńirdegi úlken bir tulǵa. Fototilshiniń oblys óńirinde kirmegen ujymy, aralamaǵan eldi mekeni joq desek, artyq aıtqandyq emes. Gazette 15−20 jýrnalıst bolsa, fototilshi – jalǵyz. Kóktemgi egis, kúzgi oraq, mal tóldetý, mal qystatý sııaqty jyldyń tórt mezgilimen qabattasyp kelip jatatyn naýqandyq jumystarda jýrnalısterdiń bárimen sol jalǵyz fototilshi júredi. Tájirıbeli fototilshi Orynbaı Balmurat ekeýmiz bir kezderde jabylyp qalǵan Torǵaı, Kókshetaý oblystarynyń aýdandary qosylyp irilengen Aqmola oblysyn talaı-talaı sharlaǵanymyz da shyndyq. Oblystyq gazetterdiń múıizi qaraǵaıdaı eshbir jýrnalısi «Men oblystyń birinshi basshysymen jıi-jıi saparlas boldym», dep maqtana almaıtyny anyq. Al Orynbaı Balmurattyń «01» «Volganyń» artynda shalqaıa otyryp, oblystyń birinshi basshysy Andreı Braýnmen issaparǵa shyqqanyn talaı kórdik.
О́mir atty osy bir uzaq saparda árkimniń ózgege uqsamas óz soqpaǵy bar. Árkim óz soqpaǵyn hal-qaderinshe mándi de maǵynaly ótkizgisi keledi. Bul rette bireýler eptilik tanytyp, aýyrdyń ústimen, jeńildiń astymen júrip-aq degenine jetip jatsa, endi bireýler beınettiń ashy dámin tata júrip, adal eńbek, jeke qabiletimen maqsat bıigine kóteriledi. Mine, búgin alpystyń asqaryna qadam basqan belgili fotojýrnalıst Orynbaı Tilepbaıuly da ózgege uqsamas óz soqpaǵyn qarapaıym qabiletimen somdady. 1999 jyldan beri el gazeti «Egemen Qazaqstanda» soqpaǵyn shyńdap, jemisti eńbegin jalǵastyryp keledi. Sonaý bir keńes zamanynda О́zbekstan sý sharýashylyǵyn basqarǵan marqum ákesi Tilepbaı boıyna sińirip, ulaǵat etken adaldyqty árqashan temirqazyq etip ustanǵan ol óz soqpaǵyna beıneti mol fotojýrnalıstıkany mansuq etti. Fotojýrnalıstıka atty osy bir tylsym álemdegi otyz jyldan astam eńbek jolynda onyń ózindik qoltańbasy, izin jalǵastyrar izbasarlary da barshylyq. Iá, Orekeńniń somdaǵan soqpaǵy shymyr, azamattyq ustanymy bolattaı berik.
Orynbaı aqar-shaqar berekeli shańyraqtyń tuǵyry. О́mirlik jary Qorlan Erhanqyzy ekeýi úsh bala ósirip, tórt-bes nemere súıip otyr.
Jylqybaı JAǴYPARULY,
«Egemen Qazaqstan»