Áıtse de dál qazirgi kúni óńirdegi Mártók, Qarǵaly jáne Áıteke bı aýdandarynyń astyq ósirýshileri dándi daqyldar egistigin orýdy eńsere bastady. Munda ortasha eseppen ár gektardan 10,7 -11,5 sentnerden ónim jınalýda. Árıne munyń tómen ónim emestigi anyq. Sonymen birge, onyń sońǵy kórsetkish emes ekenine de ekpin túsirgen jón. Aldaǵy kúnderde bıylǵy jyldyń jańa astyǵynyń túsimi ulǵaıady dep boljanǵan.
Tutastaı alǵanda bıylǵy oraq kezinde óńirdegi eginshilikpen aınalysatyn agroqurylymdar 400 myń gektarǵa jýyq alqaptyń astyǵyn qambaǵa quımaq. Qazir bul is bel ortaǵa taıap keledi. Degenmen, onyń aýyr júgi áli de alda dep bilemiz. Aımaq aýmaǵyndaǵy astyq jınaý naýqany tek sońǵy kúnderi ǵana qarqyn ala tústi, dedi gazet tilshisine Aqtóbe oblystyq aýyl sharýashylyǵy basqarmasynyń basshysy Qusaıyn Sársenbaı.
Biz oblystyń egin ósirýge yńǵaıly óńirlerine jýrnalıstik issapar boıynsha jolymyz túsken kezde egis sharýashylyǵy taýarlaryn óndirýshiler oraqtyń alǵashqy kúnderi 5,7 myń gektar alqaptyń dándi daqyldaryn jınaǵanyna kóz jetkizdik. Ári bul deńgeıdiń múmkindik shegi emes ekenin de tereń túısindik. Onyń mán-jaıyn egistiktiń bel ortasynda júrgender iri astyqty sharýashylyqtar bel sheshe kirisken kezde bul kólemniń budan ári ulǵaıa túsetinimen baılanystyrdy. Sol kezde búgingi kórsetkishti 10 myń gektarǵa deıin jetkizýge múmkindik týǵyzylmaq. Joǵaryda kórsetilgen astyq qamyrlylyǵy ótken jylǵy deńgeıden joǵary ekenin eskersek, oraq naýqany nátıjesinde aqtóbelik astyq ósirýshiler sapaly ári qalypty ónim alatynyna kúmán týmaıdy.
Oraq naýqany yrǵalyp-jyrǵalýdy, kidiris pen kesheýildeýdi kótermeıdi. Tabıǵattyń ár kúngi qolaıly sáti dıqandar úshin tek tıimdilik pen paıda ákele alady. Qazirgi kezde oblystaǵy astyq jınaýshylar qajetti janar-jaǵarmaımen jáne ózge de naýqanǵa qajetti tehnıkalarmen tolyqtaı qamtamasyz etilgen. Bul faktordyń ózi de oraq naýqanyn tabysty túrde ári óz ýaqytynda aıaqtaýǵa alǵyshart qalamaq.
Sonymen birge, oraqtyń qyzǵan shaǵynda tehnıkalardyń bos turyp qalmaýyna jol bermeý isiniń de mańyzy aıryqsha. Bul baǵytta operatorlardyń táýlik boıy úzilissiz jumys jasaý tártibi ornyqqan. Jańa astyqty qabyldap alý isinde kidiris bolmaýynyń da alar orny bólek. Osy oraıda oblystaǵy alty astyq qabyldaý orny jańa astyqty kesheýildetpeı qabyldaı bastaǵanyna kýá boldyq. Onyń báriniń tıisti lısenzııalary bar eken. Osylaısha búgingi kúni Aqtóbe aımaǵynda egin orý naýqany kún saıyn qarqyn alyp keledi. О́ńirdegi astyq ósirýshilerdiń qazirgi jınaqy is-áreketi egin oraǵyn belgilengen kestege saı aıaqtaýǵa baǵyttalǵan.
Temir QUSAIYN, «Egemen Qazaqstan» Aqtóbe oblysy