Memleket basshysy bekitken 2015–2025 jyldarǵa arnalǵan sybaılas jemqorlyqqa qarsy strategııany iske asyrý maqsatynda qoǵam belsendileriniń tikeleı aralasýymen jeń ushynan jalǵasatyn jegi qurttyń tamyryna balta shabý úshin arnaıy top qurylyp, qyzmetke kiriskeni belgili. Atalǵan toptyń kezekti basqosýyna jetekshilik etken Nurlan Erimbetov osy kúnderi Qarjy mınıstrliginiń sybaılas jemqorlyqqa qarsy júrgizip otyrǵan jumysy kóńil kónshitpeıtinin aıtyp, syn tezine aldy. Al Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev Arnaıy top ókilderimen júrgizilgen birlesken taldaý qorytyndysy keıbir organdardyń zańnamalyq aktilerde jáne uıymdastyrýshylyq-basqarýshylyq qyzmetinde birqatar sybaılas jemqorlyq táýekelderin anyqtaǵanyn málimdedi.
«Táýekelderdiń jartysynan kóbi memlekettik organdardyń óz qyzmetinde basshylyqqa alatyn normatıvtik-quqyqtyq aktilerde anyqtalǵan. Biz muny agenttik pen «Atameken» ulttyq kásipkerler palatasymen birlesken jol kartasyn iske asyrý nátıjelerin táýelsiz sarapshylarmen qarastyrý barysynda sybaılas jemqorlyqqa qarsy aýqymdy sharalarǵa júrgizilgen taldaý-saraptama derekterine súıene otyryp aıtqymyz keledi», dedi ol.
A.Shpekbaevtyń aıtýynsha, elimizde bıznesti damytýmen baılanysty memlekettik organdar qyzmetiniń 16 salasy jyl basynan beri muqııat zerttelgen. Taldaý nátıjesinde, jemqorlyq oqıǵasyn joıý jóninde 280 usynym qabyldanǵan bolsa, onyń 62 paıyzy (174) túrli deńgeıdegi normatıvtik-quqyqtyq aktilerge ózgerister engizýdi quptaıdy. Qalǵan 38 paıyzynda memlekettik qyzmetterdi kórsetý salalaryn retteý, baqylaý jáne ruqsat berý fýnksııalary men memlekettik satyp alýdy ótkizý prosedýralary jáne personalmen jumys júrgizýge qatysty usynymdar bolyp tabylady eken. Jıyn barysynda keden qyzmetiniń jumyskerlerin portatıvti beınetirkeýlermen qamtamasyz etý normalaryn bekite otyryp, ony naqty qoldanysqa engizbese, atalǵan saladaǵy sybaılas jemqorlyq áreketterin azaıtý múmkin emestigi de aıtyldy. Memlekettik kirister komıteti qyzmetkerleriniń jumysyna aıqyndyq pen ashyqtyq quraldaryn engizý mańyzdylyǵy jónindegi pikirdi arnaıy baıandama jasaǵan Sybaılas jemqorlyqqa qarsy saıasat departamentiniń dırektory Salaýat Múksimov bildirdi.
О́z kezeginde sóz alǵan Qarjy mınıstriniń orynbasary Baýyrjan Tortaev mınıstrlik bekitilgen jospar boıynsha is-sharalar legi jyl sońyna deıin tolyq iske asyrylatyndyǵyna sendirip baqty. «Keden qyzmetiniń jumysshylary úshin beınetirkeýlerdi alý qujatyna qazirgi kezde qol qoıylǵan. Salyqtyq jáne kedendik ákimshilendirý jónindegi «Astana-1» aqparattyq júıesi qorytyndy testileý deńgeılerinen ótýde jáne bul júıe de jaqyn kúnderi iske qosylatyn bolady», dedi B.Tortaev. Otyrys qorytyndysynda Arnaıy monıtorıngteý tobynyń músheleri Qarjy mınıstrligine Sybaılas jemqorlyqqa qarsy strategııany júzege asyrýǵa qatysty agenttik usynymdaryn oryndaý qajettigin eskertti. Sonymen qatar, mundaı talap-tilekter qaperge alynbaǵan jaǵdaıda jaýapty laýazymdy tulǵalardy tártiptik jaýapkershilikke tartý jóninde agenttik atynan Prezıdent Ákimshiligi men Úkimetke arnaıy hat joldaý jaıy da aıtyldy.
Nurlybek DOSYBAI, «Egemen Qazaqstan»