Kezdesý barysynda G.Ábdiqalyqova bıyl elimizdiń EQYU músheligine engenine 25 jyl tolǵanyn atap ótti. Ol 62-shi ret ótkizilip otyrǵan Pagýosh konferensııasyna Parlamenttik Assambleıa basshylarynyń qatysýy ıadrolyq qarýsyzdanýdyń mańyzyn eseleıtinin málimdedi. Sondaı-aq, atalǵan máselege Qazaqstannyń aıryqsha kóńil bóletinine toqtaldy.
Memlekettik xatshy bıyl Qazaqstanda strategııalyq damýyndaǵy betburysty kezeń ekenin aıtty. «Qańtarda Elbasy Nursultan Nazarbaev birqatar prezıdenttik ókilettikterdi Parlament pen Úkimetke berý arqyly bılik tarmaqtary arasyndaǵy qaıta bólý jóninde bastama kótergen-di. Konstıtýsııalyq reformalar jarııalanǵannan keıin Memleket basshysy xalyqqa «Qazaqstannyń úshinshi jańǵyrýy: jahandyq básekege qabilettilik» atty jyl saıynǵy Joldaýyn arnady. Prezıdenttiń úshinshi negizgi bastamasy onyń «Bolashaqqa baǵdar: rýxanı jańǵyrý» baǵdarlamalyq maqalasy boldy», – dedi Gúlshara Ábdiqalyqova.
Sonymen qatar G.Ábdiqalyqova Elbasy qoldaýymen Áıelder isteri jáne otbasylyq-demografııalyq saıasat jónindegi ulttyq komıssııanyń bılik, azamattyq qoǵam jáne xalyqaralyq uıymdar arasyndaǵy dıalogqa arnalǵan tıimdi platformaǵa aınalǵanyn málimdedi. Onyń aıtýynsha, genderlik saıasattyń «Erler men áıelderdiń teń quqyqtarynyń jáne teń múmkindikteriniń memlekettik kepildikteri týraly» jáne «Turmystyq zorlyq-zombylyq profılaktıkasy týraly» zańdar arqyly retteletinin atap kórsetti. Memlekettik xatshy elimizdiń 2006-2016 jyldarǵa arnalǵan Genderlik teńdiń strategııasy sátti iske asyrylǵanyn, 2030 jylǵa deıingi otbasylyq jáne genderlik saıasat tujyrymdamasy bekitilgenin xabarlady.
Gúlshara Ábdiqalyqova terrorızmmen kúresý jóninde arnaýly komıtet qurý jónindegi EQYU Parlamenttik Assambleıasy tóraıymy K.Mýtotonenniń bastamasyn Qazaqstan tarapy qoldaıtynyn jetkizdi. Sondaı-aq, memlekettik xatshy qurmetti qonaqtardy «EKSPO-2017» kórmesi aıasynda 31 tamyz ben 1 qyrkúıek aralyǵynda ótetin «Áıelder bolashaq energııasyn qoldaıdy» atty xalyqaralyq forýmǵa qatysýǵa shaqyrdy. G.Ábdiqalyqova ortalyqtyń qalyptasýy men damýyna EQYU-nyń óz úlesin qosatynyna senimin bildirdi.
Abaı ASANKELDIULY,
«Egemen Qazaqstan»