Jańa oqý jylynyń qarsańynda Aral, Qazaly aýdandarynda birneshe mańyzdy áleýmettik nysandardyń saltanatty ashylýy ótti. Oǵan Qyzylorda oblysy ákiminiń orynbasary Rýslan Rústemov qatysty.
Ol aldymen Aral aýdany Amanótkel aýyldyq okrýgi Aqqulaq eldi mekenindegi jańa mekteptiń, budan bólek jańa balabaqshanyń ashylýyna qatysty.
Sodan soń oblys ákiminiń orynbasary Rýslan Rústemov Aqjona aýyldyq okrýgi Maıdakól aýylyndaǵy jańa №98 orta mekteptiń ashylýyna qatysty. Jańa ǵımarat eki qabattan, eki bloktan turady. Onda oqý bólmeleri, sport zal, medısınalyq bólme, sharýashylyq bólmeleri, ákimshilik, muǵalimder bólmesi, garderob, 80 oryndyq ashana, 120 oryndyq májilis zaly jalpyǵa jáne múgedekterge arnalǵan ájethana, jýynatyn bólmeleri qarastyrylǵan.
Shara barysynda Aqjona aýyldyq okrýginiń áıelder keńesiniń tóraıymy, mekteptiń burynǵy dırektory, ardager-ustaz Kúlásh Sultanqyzy Leker aýyl turǵyndary atynan alǵys bildirdi.
- Elbasymyz Nursultan Ábishuly Nazarbaev aldymyzǵa 2020 jylǵa deıin oryndalýǵa tıisti basty 3 mindet qoıǵan bolatyn: úsh aýysymdyq jáne apattyq mektepterdi joıý men 3-6 jastaǵy búldirshinderdi balabaqshamen qamtý. Aldymen, úsh aýysymdyq mektepterdi túbegeıli joıýǵa qol jetkizdik. Sodan soń, ózderińiz biletindeı, oblys boıynsha 3-6 jas aralyǵyndaǵy búldirshinderdi mektepke deıingi tárbıemen qamtamasyz etýdi merziminen buryn 100 paıyzǵa oryndadyq. Munda memlekettik-jeke áriptestikti damytýdyń úlesi basym ekenin aıtý kerek,- dedi R.Rústemov.
Osy kúni Qazaly aýdanynda da 2017-2018 oqý jyly qarsańynda birqatar áleýmettik nysandar paıdalanýǵa berildi. Áıteke bı kentindegi №216 orta mektepke qosymsha qurylys jumystary júrgizilip, el ıgiligine paıdalanýǵa berildi. Mektep aýlasynda dızeldi elektrostansııa, sportzal, ashana, sheberhana ornalastyryldy.
Qazaly aýdany Sháken aýyldyq okrýgi Shıli aýylyndaǵy №259 negizgi mekteptiń ashyldy. Ǵımarat eki qabattan turady. Onda oqý bólmeleri, muǵalimder bólmesi, medısınalyq bólme, sheberhana, mýltımedııa jáne lıngafon kabınetteri, sharýashylyq bólmeleri, garderob, 32 oryndyq ashana, 40 oryndyq akt zaly, jalpyǵa arnalǵan ájethana, jýyn bólmeleri qarastyrylǵan.
Shara barysynda aýyl ardagerleri turǵyndar atynan aımaq basshylyǵyna keleshek urpaq ıgiligi úshin atqaryp jatqan júıeli jumystarǵa alǵystaryn bildirdi.
Esterińizge sala keteıik, Qyzylorda oblysynda úsh aýysymdyq bilim berý júıesi joıylyp, 3 pen 6 jas aralyǵyndaǵy balalardy balabaqshamen qamtý máselesi sheshildi. Jyl sońyna deıin apatty jaǵdaıdaǵy mektepter sanyn tolyqtaı sheshý josparlanyp otyr.