«Qazsport» telearnasynan tikeleı efırde kórsetkenindeı, match barysynda qos komandanyń da gol soǵatyn múmkindikteri boldy. Ekinshi kezeńniń aıaǵyna taman «Barys» oıynshylary ábjildik tanytty. Sondaı sátterdiń birinde, 40-mınýtta kapıtan Naıdjel Doýstyń pasynan keıin komandaǵa bıyl kelgen kanadalyq Lındeı Veıdiń soqqysyn «Spartaktyń» qaqpashysy Nıkıta Bespalov qaıtarǵanymen, shaıbaǵa birinshi jetken Marten Sen-Per «Barystyń» jańa maýsymdaǵy alǵashqy golynyń avtory atandy.
Úshinshi kezeńde qazaqstandyq maman Evgenıı Koreshkov jattyqtyratyn «Barys» barynsha jınaqy oınap, basymdylyqty saqtap qalýmen birge ońtaıly sátterdi paıdalanýǵa tyrysty. Al máskeýlikter tarazy basyn teńestirýge umtylyp baqty. Oıyn bitýge úsh mınýt qalǵanda, «Spartak» san basymdylyǵyna ıe boldy. Alaıda shvesııalyq qaqpashy Henrık Karlsson bastaǵan «Barystyń» qorǵanysyn buza almaǵan meımandardyń ózderi tártip buzyp, fınlıandııalyq qorǵaýshy Vılle Laıýnen aıdynnan qýyldy. Osyǵan qaramastan, «Spartak» qaqpashysynyń ornyna oıynshy shyǵaryp, alǵa umtyldy. Osy kezde Marten Sen-Per bos qalǵan qaqpany dál kózdedi.
Sóıtip, «Barys» jańa maýsymdaǵy birinshi jeńisine qol jetkizdi.
Aıta keteıik, jaqynda qazaqstandyq shabýylshy Talǵat Jaılaýov ta komandaǵa qaıta oraldy.