Elbasy N.Nazarbaevtyń bıylǵy «Qazaqstannyń úshinshi jańǵyrýy: jahandyq básekege qabilettilik» atty Joldaýyn iske asyrý maqsatynda mańǵystaýlyq pedagogtardyń oblystyq tamyz konferensııasy ótti.
Sharaǵa oblys ákimi E.Toǵjanov, Bilim jáne ǵylym mınıstrligi Mektepke deıingi jáne orta bilim berý departametiniń dırektory Sh.Karınova «Nazarbaev zııatkerlik mektepteri» DBBU tóraıymy K.Shamshıdınova jáne t.b qatysty.
О́tken oqý jylynda Mańǵystaý oblysynyń bilim salasy birqatar jetistikterge jetti. Oblys komandasy respýblıkalyq pándik olımpıadada bas júldege ıe boldy. Halyqaralyq Mendeleev olımpıadasynda bilim ınnovasııa lıseıiniń 11 synyp oqýshysy Ǵalymjan Moldaǵulov 3 oryndy ıelendi. Reseıde ótken «World Skills» halyqaralyq chempıonatynda týrızm jáne Beıneý polıtehnıkalyq kolledj stýdentteri Tilektes Álqýatov pen Erkebulan Sultanǵalıev júldeli oryndar aldy.
Bıyl memlekettik bilim granty ıegerleri 2 esege artty. 2016 jyly – 542 grant bolsa, 2017 jyly -1053 grant, onyń ishinde «Serpin» baǵdarlamasy boıynsha - 446, al 2016 jyly -158. Jańaózen qalasynyń №18 orta mektebiniń 88 túlektiń ishinen 41-i memlekettik grantqa ıe boldy.
Bıylǵy jyldan bastap daryndy balalardy qoldaý maqsatynda oblys ákiminiń 50 bilim granty bólindi.
Sapaly bilim – qomaqty qarjyny talap etedi. Jyl saıyn bilim salasyna bólinetin qarjy kólemi ulǵaıyp keledi. О́tken jylmen salystyrǵanda bıyldyń ózinde 14,6 mlrd, ósti. 2016 jyly – 47,9 mlrd. bolsa, 2017 jyly – 62,5 mlrd. qurap otyr.
Osy jyly Mańǵystaý oblysynda 9 mekteptiń qurylysy bastaldy.
Qazirgi tańda oblysyń 700 muǵalimi aǵylshyn tilin oqyp jatyr. Jańa oqý jylynda oblystyq bıýdjet esebinen 300 aýyl mektepteriniń ustazdaryn oqytý kózdelip otyr.
– Elbasymyz bıylǵy «Qazaqstannyń úshinshi jańǵyrýy: jahandyq básekege qabilettilik» Joldaýynda adamı kapıtal sapasyn arttyrýdy kún tártibine qoıdy. Ol úshin bilim berý júıesiniń rolin ekonomıkalyq ósýdiń jańa modeliniń ortalyq býynyna aınaldyrýmyz qajet. Memleket basshysy N.Nazarbaev «Bolashaqqa baǵdar: Rýhanı jańǵyrý» maqalasynda bilim berý salasyndaǵy mańyzdy máselelerdi sheshýdiń baǵdarlamasyn usyndy. Endigi baǵyt-baǵdar aıqyn. Maqsatymyz – ulttyq sana-sezimi joǵary, otanshyl, tabysty, jalpyadamzattyq jáne ulttyq qundylyqtardy boıyna sińirgen, el taǵdyryna úlken jaýapkershilikpen qaraıtyn tulǵa tárbıeleý, - dedi óz sózinde Mańǵystaý oblysynyń ákimi Eraly Toǵjanov.
Shara sońynda birqatar uztazdar oblystyq ákimdiktiń, QR Bilim jáne ǵylym mınıstrliginiń Qurmet gramotalary, Alǵys hattarymen, «Qazaqstan Respýblıkasynyń bilim berý isiniń qurmetti qyzmetkeri», «Y.Altynsarın» tósbelgilerimen marapattaldy.
«Orta bilim beretin úzdik uıym» oblystyq konkýrsynyń grantyna Túpqaraǵan aýdany Aqshuqyr mektep-lıseıi ıe boldy.
Bilim berý uıymdarynda jyl boıy tabysty eńbek etip, túrli deńgeıde jetistikke jetken 10 ustazǵa oblys ákimi atynan elimizdiń shıpajaılaryna joldama tabystaldy.
Konferensııada pedagogtardyń kásibı deńgeıin arttyrý jáne oblystyń ınnovasııalyq bilim júıesiniń damýy máseleleri boıynsha birlese jumys atqarý maqsatynda Mańǵystaý oblysynyń ákimdigi men «Nazarbaev zııatkerlik mektepteri» derbes bilim berý uıymynyń arasynda ózara yntamaqtastyq týraly memorandýmǵa qol qoıyldy, delingen baspasóz habarlamasynda.
Gúlaıym ShYNTEMIRQYZY, «Egemen Qazaqstan»