Almaty qalasynyń eń kórikti demalys oryndarynyń biri, qala turǵyndary men qonaqtarynyń júreginen oryn alǵan Kóktóbede ashyq aspan astyndaǵy mýzyka festıvali bıyl osymen ekinshi ret uıymdastyrylyp otyr.
«Kóktóbe opera – 2017» mýzyka merekesi mundaǵy mańyzdy festıvalderdiń biri, sebebi myń-san shamdary juldyzdaı jamyraǵan shahardyń tóbesinen qarap otyryp tamyljyǵan tabıǵat aıasynda Abaı atyndaǵy Memlekettik akademııalyq opera jáne balet teatry sımfonııalyq orkestriniń súıemeldeýimen ulttyq opera óneriniń artısteri men álemniń úzdik sahnalarynan shaqyrylǵan opera jáne balet juldyzdarynyń ónerin tamashalaý adamǵa umytylmas áser syılaıdy.
Alǵashqy festıval byltyr Almatynyń 1000 jyldyǵyn merekeleý aıasynda uıymdastyrylsa, bıylǵy «Kóktóbe opera – 2017» «Qala kúni» men EKSPO – 2017 halyqaralyq kórmesiniń qurmetine oraılastyrylǵan. Konsert bastalmas buryn, juldyzdy aspan astyn sulý sazben terbegen bıik taý bókterindegi mýzyka merekesine mártebeli kórermen retinde kelgen Qazaqstannyń Memlekettik hatshysy Gúlshara Ábdihalyqovaǵa qala ákimi Baýyrjan Baıbek qaıta qalpyna keltirilip, Kóktóbe tórine qoıylǵan «Sulýshash» pannosy týraly áńgimelep berdi. Týyndylary Tretıakov gallereıasynan oryn alǵan ataqty sýretshi Moldahmet Kenbaev pen músinshi Nıkolaı Sıvchınskıı 1970 jyly «Qazaqstan» dúkeni ornalasqan úıdiń bir qabyrǵasyna qolyna alqa ustaǵan arýdyń beınesin mozaıkamen beınelep, oǵan «Sulýshash» dep ataý beredi. Keıin 2000 jyldary «Sulýshash» dúken qabyrǵasynan izim-ǵaıym joq bolyp ketedi.
Qazaqtyń tól mádenıetinen habar beretin ulttyq boıaýy qanyq sol has sulýdyń beınesin sýretshiniń uly Alpamys Kenbaev qaıta jańǵyrtyp, qala ákimdiginiń kómegimen jańartylǵan týyndyny barsha almatylyqtar men shahar meımandarynyń súıikti mekenine aınalǵan Kóktóbege ákep ornalastyrǵanyn aıtty. Tamyzdyń tamyljyǵan túnindegi qustaı qalyqtaǵan klassıkalyq áýenniń sazy kórermendi eki saǵattan artyq áldıledi. Bıik taýdyń baýraıynda saf daýyspen shyrqalǵan ásem ánniń árqaısysy tasqa baryp túıisip, qulaqqa qaıta shalqyp jetkendeı erekshe estildi.
Joǵary talǵammen toptastyrylǵan konserttik baǵdarlamada ulttyq mýzyka óneriniń jaýharlary men álemdik klassıkalyq ónerdiń altyn qoryna engen týyndylardan úzindiler sheber úılestirilgendikten, kórermen bir tynyspen otyryp tyńdady. Abaı atyndaǵy akademııalyq Opera jáne balet teatrynyń sımfonııalyq orkestri súıemeldegen Dj.Verdı, Dj.Pýchchını, Dj.Rossını, J.Bıze, P.Chaıkovskııdiń ǵajaıyp shyǵarmalary Qazaqstan Respýblıkasynyń eńbek sińirgen qaıratkeri, «Astana Opera» teatrynyń bas dırıjeri Alan Bóribaevtyń qolyndaǵy taıaqshanyń qudiretimen sıqyrly áýenge aınalyp, sulýlyqqa ińkár jandarǵa rýhanı lázzat syılady.
Bıylǵy festıvaldiń basty qonaǵy, Italııadan arnaıy shaqyrylǵan belgili opera ánshisi Stefano La Kolla óz repertýaryndaǵy eń úzdik arııalarynyń birnesheýin oryndap, kópshilikti tenor daýysynyń qudiretimen terbetti. Sondaı-aq, Qazaqstan klassıkalyq óneriniń beldi ókilderi, Qazaqstannyń eńbek sińirgen qaıratkeri A.Tregýbenko, G.Dáýirbaeva, J.Baspaqova, B.Jomartov, Qazaqstan Memlekettik syılyǵynyń laýreaty T.Kúzenbaev, halyqaralyq konkýrstardyń laýreattary O.Davydenko, N.Nadenova, E.Nıkonova, Z.Altynbaeva, E.Sakavov, D.Talasbekova, D.Sádýaqasov, H.Nuralıev, N.Mezına, O.Tamırov jáne teatrdyń balet trýppasy qonaqtardy ónerimen tamsandyrdy.
Aıgúl AHANBAIQYZY,
«Egemen Qazaqstan»
ALMATY