Qazaqstan Respýblıkasynyń Memlekettik hatshysy Gúlshara Ábdiqalyqova Almaty qalasyna jumys saparymen bardy, dep habarlady Prezıdenttiń baspasóz qyzmeti.
Sapar barysynda Gúlshara Ábdiqalyqova 2016 jyly qalanyń 1000 jyldyǵyna oraı ashylǵan Almaty murajaıynda boldy. Murajaı qalanyń iri ǵylymı jáne mádenı ortalyǵy bolyp sanalady. Onyń ekspozısııasy taqyryptyq 11 zalda ornalasqan. Olar: «Almatynyń ejelgi tarıhy», «Orta ǵasyrdaǵy Almaty tarıhy», «Qazaq memlekettiliginiń bastaýynda», «Jetisý etnografııasy», «Almatynyń Vernyı kezeńindegi tarıhy», «HH ǵasyrdaǵy Almaty», «Mádenıet pen ónerdiń damýy», «Alpınızm tarıhy», «Jeltoqsan», «Almaty jáne Elbasy», «Beıbitshilik pen kelisim modeli» zaldary.
Sodan keıin Memlekettik hatshy 1931-1933 jyldardaǵy asharshylyq qurbandaryna arnalǵan eskertkishke gúl shoǵyn qoıdy. Eskertkish Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasyndaǵy mindetterdi iske asyrý aıasynda 2017 jylǵy 31 mamyrda «Qaraǵaıly» saıabaǵynda ashylǵan. Onyń eskızi Monýment óneri salasyndaǵy jańa qurylystardy ornatý jónindegi memlekettik komıssııanyń sheshimimen 20-dan astam jumystyń arasynan tańdap alyndy. Sábıin baýyryna basyp turǵan ana beınelengen eskertkish qola men granıtten jasalǵan bıiktigi tórt metr.
Sapar sońynda Memlekettik hatshy «Almaty Kók-Tóbe Opera – 2017» halyqaralyq festıvaline qatysty. Is-sharada Abaı atyndaǵy Qazaq Memlekettik akademııalyq opera jáne balet teatry sımfonııalyq orkestriniń súıemeldeýimen elimizdiń úzdik solısteri men álemniń opera jáne balet juldyzdary óner kórsetti.
Alǵashqy festıval 2016 jyly Almaty qalasynyń 1000 jyldyǵyn merekeleý aıasynda uıymdastyryldy. Bıyl festıval «Astana EKSPO-2017» halyqaralyq kórmesine jáne «Qala kúni» merekesine oraılastyrylyp otyr.