Keshe Astanada EKSPO-2017 kórmesi aıasynda kezekti mańyzdy sporttyq shara – Shanhaı yntymaqtastyq uıymynyń (ShYU) tarıhyndaǵy ekinshi halyqaralyq marafon ótti. Alǵashqy marafon byltyr ShYU-nyń 15 jyldyǵyna oraı Qytaıda uıymdastyrylǵan bolatyn.
Bıylǵy saıys Azııadaǵy ózara is-qımyl jáne senim sharalary jónindegi keńestiń (AО́SShK) 25 jyldyǵyna oraı ótkizildi. Osy jyldyń 22 mamyrynda ataýly datany halyqaralyq marafonmen birge atap ótý qajet degen sheshim shyǵarylyp, Qazaqstan Respýblıkasynyń Mádenıet jáne sport mınıstrligi, Qazaqstan Respýblıkasynyń Jeńil atletıka federasııasy men Qytaıdyń «Shanhe» Iýnnan mádenıet jáne sport kompanııasy ShYU men AО́SShK halyqaralyq Astana marafonyn ótkizý týraly kelisimge kelgen edi. Mundaǵy basty maqsat – uzaq merzimdi, tıimdi qarym-qatynas ornatý.
Astanadaǵy halyqaralyq marafonǵa álemniń 20 elinen alty myńǵa jýyq sportshy qatysty. Onyń ishinde ShYU-ǵa múshe árbir memleketten jalpy sany 50 kásibı sportshy tartyldy.
Tań ata bastalǵan marafondy Mádenıet jáne sport mınıstri Arystanbek Muhamedıuly ashyp, qatysýshylarǵa sáttilik tilegen soń, sportshylar kezek-kezegimen júgirýdi bastady. Marafonshylar úsh qashyqtyqqa, ıaǵnı EKSPO-2017 kórmesiniń qurmetine oraı 2017 metrge, 10 shaqyrymǵa jáne 42 shaqyrym 195 metrge júgirdi. Jelaıaqtar jarysynda elimizdiń joǵary shendi tulǵalary da óz baqtaryn synady. Atap aıtar bolsaq, Qazaqstan Respýblıkasy Prezıdenti Ákimshiliginiń Basshysy Ádilbek Jaqsybekov, Ulttyq qaýipsizdik komıtetiniń tóraǵasy Kárim Másimov, Mádenıet jáne sport mınıstri Arystanbek Muhamedıuly, Aqparat jáne kommýnıkasııalar mınıstri Dáýren Abaev jáne Qazaqstan Damý banki basqarmasynyń tóraǵasy Bolat Jámishev marafon júgirýge tilek bildirdi. Sondaı-aq, elimizdiń Olımpıada chempıondary men júldegerleri de marafonǵa qatysyp, sportshylarǵa qoldaý kórsetti.
El tarıhyndaǵy tuńǵysh kásibı marafon jarysynyń qorytyndysy boıynsha 42 shaqyrymdy quraıtyn eń uzaq qashyqtyqta ózbekstandyq sportshy Andreı Petrov pen belorýssııalyq júırik Vladıslav Prıamov máre syzyǵyn bir ýaqytta kesip ótken. Nátıjesinde, tóreshiler aqyldasa kele birinshi oryndy ózbek sportshysyna berdi. Úzdik úshtikti qyrǵyzstandyq Ilıa Tıapkın qorytyndylady. Jeńimpazǵa 13 myń AQSh dollary, ekinshi orynǵa 6 myń dolar jáne úshinshi orynǵa 4 myń dollar syıaqy berildi.
Sondaı-aq marafonnyń 10 shaqyrymdyq saıysynda erler arasynda birinshi oryndy elordalyq Qudaıbergen Zeınollaev, ekinshi oryndy Almaty oblysynan kelgen Daryn Qonysbaev ıelendi. Júldeli úshinshi orynǵa OQO-nyń jelaıaǵy Artem Chıjevskıı qol jetkizdi. Qyzdar arasyndaǵy saıysta Tatıana Neroznak top jardy. Kúmis júlde Shymkentten kelgen Balnur Asylbektiń enshisine buıyrsa, úshinshi oryndy kókshetaýlyq Nadejda Bekmaǵambetova ıelendi.
Sonymen qatar, EKSPO-2017 sharasyna oraı uıymdastyrylǵan 2017 metr qashyqtyqtyń erler arasyndaǵy saıysynda astanalyq stýdent Álimjan Seıdeshov jeńimpaz atandy. Taǵy bir astanalyq Ádilbek Serikbek ekinshi orynnan kórinse, qola júlde semeılik Evgenıı Orhıpovqa buıyrdy. Áıelder arasyndaǵy jarysta astanalyq Anar Qyryqbaeva bas júldeni jeńip alsa, ekinshi jáne úshinshi oryndy Pavlodardan kelgen eki marafonshy – Anastasııa Sharavarova men Bella Komarova ózara bólisti.
Marafon sońy qazaq estrada ónerpazdarynyń konserttik baǵdarlamasymen jalǵasty.
Álı BITО́RE, «Egemen Qazaqstan»
Sýretterdi túsirgen Erlan OMAR, «Egemen Qazaqstan»