Osy jylǵy 24 tamyzda Qazaqstan Respýblıkasynyń 14 oblysynda aýdandyq mańyzy bar qalalary, aýyldyq okrýgteri, aýyldyq okrýgtiń quramyna kirmeıtin kentteri men aýyldary ákimderin saılaý máresine jetti.
Aýmaqtyq saılaý komıssııalarynyń málimetterine sáıkes, saılaý naýqanynda aýyl ákimine 4 059 kandıdat usynylyp, olardyń 3 951-i tirkeýden ótken, 4-24 tamyz aralyǵyndaǵy saılaýda barlyǵy 1 416 aýyl ákimi saılandy. Taratyp aıtqanda, Aqmola oblysynda – 136, Aqtóbe oblysynda – 77, Almaty oblysynda – 129, Atyraý oblysynda – 48, Shyǵys Qazaqstan oblysynda – 134, Jambyl oblysynda – 89, Batys Qazaqstan oblysynda – 95, Qostanaı oblysynda – 137, Qaraǵandy oblysynda – 129, Qyzylorda oblysynda – 72, Mańǵystaý oblysynda – 26, Pavlodar oblysynda – 98, Soltústik Qazaqstan oblysynda – 138 jáne Ońtústik Qazaqstan oblysynda 108 aýyl ákimi saılandy. Al Aqtóbe oblysyndaǵy bir aýyldyq okrýgte 20 qyrkúıekte qaıtadan saılaý ótedi.
Saılaýdyń uıymdastyrylýy men ótkizilýin 14 oblystyq, 28 qalalyq jáne 160 aýdandyq aýmaqtyq saılaý komıssııasy qamtamasyz etti. Ákimdik qyzmetke 1 264 (89,3%) er, 152 (10,7%) áıel adam saılandy. Ákimderdiń orta jas kórsetkishi 49,9 jasty quraıdy. Sondaı-aq, ákimderdiń basym bóligi 45 jas pen 55 jastyń aralyǵynda. Muny osynyń aldyndaǵy saılaý- men salystyrǵanda jas kórsetkishi 3 jylǵa ulǵaıǵan. Eń jas ákim 25 jasta, ol Ońtústik Qazaqstan oblysynan saılanǵan.
Saılanǵan ákimderdiń arasynda aýyl sharýashylyǵy boıynsha mamandar sany 15,5%-dan 21,1%-ǵa artyp otyr, bul ótken saılaýǵa qaraǵanda 6,6%-ǵa óskenin kórsetedi. Barlyq saılanǵan ákimderdiń qatarynda 370 pedagog, 234 ekonomıst, 225 ınjener, 172 zańger bar. Saılaýǵa burynǵy ákimderdiń 957-si kandıtat retinde qatysty. Naýqan barysynda barlyq deńgeıdegi saılaý komıssııalaryna jeke jáne zańdy tulǵalardan ótinishter túsken joq. Saılaý komıssııalary tarapynan qajetti uıymdastyrýshylyq is-sharalar saılaý zańnamasyna sáıkes júrgizildi.
Álısultan QULANBAI, «Egemen Qazaqstan»