Ońqańnyń oń jambasy nemese sportty jyrlaǵan kitap

«Jaqyptyń jatyr kúshi oń jaǵynda» degendeı-aq, óskemendik áriptesimiz Oń­da­syn Elýbaıdyń qalam qa­rymy erekshe qýattanyp kóri­ner, únemi oń jam­ba­sy­na iliner taqyryby sport ekenin osy kúni jurt túgel biledi. Ońqań sportqa stýdent kezinen qushtar edi. Sol qushtarlyq qanatynda Pa­rıjdegi 1998 jylǵy álem­­­dik fýtbol dodasyn, Sıdneı, Afına jáne Beıjin Olım­pıadalaryn, Týrındegi qys­qy Olım­pıa­da­ny, Koreıada ótken fýtbol chempıonatyn óz kózimen ót­kerip, sondaǵy Bekzat, Ermahan, Olga, Baq­tııar, Ba­qyt, Ilıanyń Olımp shyńyna kóterilgen juldyz­dy shaq­tarynyń shattyǵyn birge bólis­ken osy bizdiń Ońqań bolatyn. Sol ǵalamat sport ala­mandary­nyń aıtýly shejiresindeı «Aı­shy­lyq alysqa alty sapar» kitaby 2009 jyly jaryq kórse, avtordyń qoǵam men el tir­shi­liginiń alýan salasyn qam­typ, 1077 fotosýretin toptas­tyrǵan «О́mirdi sýretpen órnek­tep» atty fotoalbom kitaby 2010 jyly oqyrman kózaıymy­na aınalǵan-dy. Mine, sodan bir jyl óter-ótpeste tynymsyzdyǵy jan­kesh­tilikke jalǵasqan Ońdasyn Elýbaıdyń kezekti fotoal­bo­my qolymyzǵa tıdi. Áriptesi­miz óziniń bul  jınaǵyn «Alash­ty asqaqtatqan Azıada» dep atap, ony týǵan el Táýel­sizdiginiń 20 jyldyǵyna arna­ǵan eken. Jáne qosalqy atyn «Zolotaıa Azıada Kazahstana» dep qoıyp, júre­me­lete orys tiline aýdartyp, kitapty qazaq-orys oqyrmanyna birdeı usyn­ǵany durys bolǵan. Kitaptyń ár paraǵyn qyzyǵa ashasyń, tanymyńdy keńeı­te­siń. Júz­de­gen sýretter qaıta­lan­bas sát­terdi molynan qam­typ beınelegen. Astana men Al­matyda boı kóterip, Azıada abyroımen ótip bolǵannan keıin de jan jadyratyp el ıgiligine aınal­ǵan ǵalamat sport keshenderi, shańǵy bazalary, Shym­bulaq, Medeý, Tabaǵan men Sol­datsaı­daǵy jan alysyp, jan berisken sport básekeleri, Alash jurtyn asqaqtatqan álem­dik ala­mannyń barshany tańyr­qa­typ tańdaı qaqtyrǵan ashylý hám jabylý saltanat­tary da fo­to­obek­tıv­tiń qyraǵy naza­ry­nan tys qalmaǵan. Bul kitaptyń ishinde tanym da, tarıh ta, mereı de, mártebe de, taǵylym men ǵıbrat ta, saltanat pen saǵynysh ta – bári bar. Azıadanyń ashylýynda Elbasynyń sóılep turǵan sáti saltanat emes pe! Altyn, kúmis medaldardan alqa taqqan je­ńimpazdarmyzdyń árbir mara­pattalǵan sátteri mereı emes pe. 75 jastaǵy astanalyq jansebil jankúıer Saǵı aqsaqal­dyń jarysty jas jigitteı tamashalaýy taǵylym emes dep kim aıtar? Al О́skemende Azıada alaýyn jaqqan Ázaǵań – Ázilhan Nurshaıyqovtyń beınesi dúnıe jalǵandaǵy sońǵy sýreti bolar-aý, sirá. Kitapta osyndaı kóńil tolqytar, júrek eljireter sýret-sátter jeterlik. Saǵynysh degenimiz osy. Áriptesimiz Ońdasyn Elýbaı sol saǵynysh sátterin tap basa bilýimen de qyzyqtyrady bizdi, ózine degen qurmet sezimin tý­dyrady. Qorǵanbek AMANJOL, Astana.