Qambasy astyqqa, tóskeıi malǵa tolǵan Aqterek aýylynda aıta júrer jaqsylyqtar jeterlik

Almaty – Tashkent tasjolynyń ústińgi qaptalyna kólbeı ornalasqan Aqterek aýyly Almaty oblysynyń Jambyl oblysymen shekaralas jatqan irgeli eldi-mekeni. Mamyrajaı kúıdegi taza qazaqy aýyldyń búgingi tynys-tirshiligi, qam-qareketi kóz qýantar­lyq. Kezinde ótpeli kezeńniń qıyn­shylyǵyn bastan ótkergenmen, aýyl tizginin Temirlan Sháınúsipov qolyna alǵaly jyrtyqtary jamalyp, tesikteri bútin­de­lip, tabystary eselenip, búginde el­diń eńsesi kóterińki, qazan-oshaq joǵa­ry degendeı, turmystary jaqsarǵan. Bıyl Aqterek jeke sharýa qoja­lyǵynyń eńbekkerleri bitik egin ósirip, ár gektardan 15 sentnerden astyq jınap, qambalaryna 5 myń tonna bıdaı quıyp aldy. Eger Aqterek óndiristik kooperatıvi qurylǵan 1994 jyly otyzdaı tehnıka, iri qara maldan eki buqa, al qoı, jylqydan tuqym qalmasa, búginde aýyldan 50 myńǵa jýyq qoı, 6 myń iri qara, 2,5 myń jylqy órip shyǵady. Osy ýaqytqa deıin aýyldaǵy bir úıdiń murty buzylmaǵan. Qaıta halyqtyń jaǵdaıynyń jaqsarǵany ǵoı, aýyl syrtynan jańa kóshe tústi. Eń bir aıta keterlik jaǵymdy jańa­lyq, Temirlan bıyl jaǵdaıy tómen qojalyq múshelerine 12 jańa úı salyp, qonys toıyn toılady. Qalǵandarynyń úı, qora-jaıyn qorshap, kósheniń sáni­ne sán qosty. Budan birneshe jyl bu­ryn 3,5 myń ga jerdi qorshap 1,5 myń túp otyrǵyzǵan alma, almurt aǵashtary byltyrdan bastap jemis bere bastady. Jyl saıyn qojalyq múshelerine baý-baqsha daqyldaryn, 5 tonna kómirin, bı­daıyn, jemin-shóbin tegin túsirip beredi. Aýyl aýdan ortalyǵynan 90 sha­qy­rym qashyqta ornalasqandyqtan halyqqa turmystyq qyzmet kórsetý salasy da ońtaıly uıymdastyrylǵan. Shashtaraz, dárihana, dúken, stomatologııa kabıneti, meıramhana, naýbaıhana, bılıard aýyl adamdaryna qaltqysyz qyzmet jasaýda. Árıne, aqterektikterge aýdan, oblys ákimdikteri qashanda qoldaý kórsetip, kómektesip otyrady. Buǵan deıin aýyl­daǵy orta mektepti kúrdeli jón­deý­den ótkizse, bıyl oblystyq bıýdjetten bólingen qarajatqa Jamanty kóshesine asfalt tóselip, turǵyndar­dyń kóńili bir kóterilip qaldy. Bir ǵana «áttegenaılary» aýyz sý máselesi to­lyq sheshimin tappaı otyr. Byltyr ob­lys bıýdjetinen qomaqty qarjy bóli­nip, bir uńǵyma qazylsa, qalǵan­daryn jáne úıdi-úıge sý tartý jumystary kelesi jyldyń esebinen qarasty­ryl­maq. Aqyryn júrip, anyq basatyn Temirlan osy aýylda týyp, ósken jigit bolǵandyqtan, jer jaǵdaıyn, aýyl tirshiligin óte jaqsy biledi. Aýylda tu­ra­tyn besiktegi baladan eńkeıgen qartqa deıin bes saýsaqtaı biledi, olardyń ár­qaısysynyń qam-qareketinen, turmys jaǵdaıynan habardar. Sondyqtan da toı-tomalaq, ólim-jitimde, turmysy na­shar otbasylaryna qolynan kelgen kómegin berýden aıanyp qalmaıdy. Onyń bul qamqorlyǵyn aýyldastary da baǵalap, Aqterektiń bel balasy atan­ǵan Temirlanǵa qashanda rızashy­lyq­taryn bildirip jatqany. Mine, osy tógilgen ter, jasaǵan eńbek eskerýsiz qalmaı, qojalyq tóraǵasy 2008 jyly «Qurmet» ordenimen marapattaldy. Al aýyldastary bolsa aldaǵy ýaqytta jańashyl da jigerli basshysynan taǵy da tyń ister, jaǵymdy jańalyqtar kútedi. Gúlzeınep SÁDIRQYZY.