Keshe Konstıtýsııa kúni qarsańynda jergilikti polısııa qyzmeti ýchaskelik ınspektorlaryna Aqtóbe oblysynyń ákimi Berdibek Saparbaev 180 qyzmet avtokóliginiń kiltin tabys etti.
Buǵan aımaqtyq bıýdjetten mıllıard tengege jýyq qomaqty qarajat jumsalǵan. Bir mezgilde tártip saqshylaryna osynshama mol kólemde materıaldyq-tehnıkalyq jaǵdaı týǵyzý isi óńirdiń arǵy-bergi tarıhynda bolyp kórmepti. Tipti munyń ózi tutastaı el óńirleri boıynsha alǵanda da sırek kezdesetin jaǵdaı dese de bolady.
Eger buǵan deıin óńirde ýchaskelik polısııa qyzmetkerleriniń qyzmet kóligimen qamtylý deńgeıi nebári 20 paıyz qurap kelgen bolsa, mereke qarsańyndaǵy mol tartýdan keıin onyń mólsheri 100 paıyzǵa bir-aq kóterildi.
«О́tken jyldyń osy kezegimen salystyrǵanda óńirdegi qylmystar sany qazir 32 paıyzǵa azaıdy. Sonymen birge qoǵamdyq qaýipsizdikti saqtaý máselelerinde de keń kólemdegi keshendi salalar júzege asty. Búgingi maqsatymyz jergilikti atqarýshy organdar týǵyzyp otyrǵan qamqorlyqqa oraı Ata Zańymyzda qarastyrylǵan talaptar deńgeıinde jergilikti polısııa mártebesin odan ári kótere túsý», dedi qyzmet kóligin tapsyrý rásiminen keıin Aqtóbe oblystyq ishki ister departamentiniń basshysy, polısııa polkovnıgi Mahambet Ábısatov.
Temir QUSAIYN, «Egemen Qazaqstan»