Jambyl oblysynda búgingi kúnde orylýǵa tıis 257,8 myń gektar dándi daqyldardyń barlyǵy sátti orylyp, óńir egin orý naýqanyn alǵashqylardyń biri bolyp támamdady.
Aımaq boıynsha 623,5 myń tonna dán bastyrylyp, oblystyń ortasha ónimdiligi gektaryna 24,1 sentnerdi qurady. Bul kórsetkish byltyrǵy jyldyń osy mezgilimen salystyrǵanda 2,1 paıyzǵa artyq. Osylaısha, bıdaı, arpa jáne basqa da dándi daqyldardy jınaý naýqany búgingi kúnge aıaqtaldy.
Oblys ákimdiginiń málimeti boıynsha, aýyl sharýashylyǵy daqyldarynyń egistik alqaby 630,2 myń gektardy quraǵan. Bul kórsetkish ótken jylǵymen salystyrǵanda 42,2 myń gektarǵa artyq bolyp otyr. Esepti aralyqta egin orý naýqanyn T.Rysqulov jáne Merki aýdandary sátti aıaqtap, nátıjesinde gektarynan 25 sentnerden astam astyq ónimi alyndy.
Egin orý naýqanynda kóshbasshy aýdandardyń qataryn Qordaı jáne Shý aýdandary tolyqtyryp otyr. Sondaı-aq, egin jınaý jumystaryna oblys boıynsha barlyǵy 911 astyq orý kombaındarynyń 701-i qatysty.
Aıta keterligi, oblys boıynsha astyq jınaý naýqany búginde 100 paıyzǵa oryndaldy. Al kartop óniminiń 74,8 myń tonnasy jınalyp, qalǵan 5,6 myń gektaryn jınaý josparlanýda. Kartoptyń ortasha ónimdiligi gektaryna 223,3 sentnerdi qurap otyr.
Sonymen birge, kartop ónimimen qosa maıly daqyldardy jáne kókónisterdi jınaý jalǵasý ústinde. Aldaǵy qyrkúıek aıynyń sońyna deıin jınaý jumystaryn aıaqtaý maqsatynda jumys júıeli túrde júrgizilip keledi.
Hamıt ESAMAN, «Egemen Qazaqstan»