Dástúrge dáneker tulǵa

Táýelsizdik saraıynda belgili qoǵam qaıratkeri, etnograf ǵalym О́zbekáli Jánibekovtiń 80 jyldyq mereıtoıyna arnalǵan etnografııalyq kórme ótti. О́zaǵańnyń qolynyń taby qalǵan asyl muralarynyń bárin birdeı sórelerge qoıý múmkin bolmaǵanmen, tulǵamen kezinde qyzmet istegen, tálim-tárbıesin kórgen shákirtteriniń eńbekterin kópshilikke tanystyrǵan bul kór­me jastarǵa halqymyzdyń salt-dástúri men ádet-ǵurpy tý­raly mol maǵlumat berýimen ta­ǵy­lymdy. Onyń tikeleı atsa­ly­sýy­men qurylǵan Yqylas atyndaǵy halyq mýzyka aspap­tary mura­jaıy men Ortalyq mem­lekettik mýzeıinde ǵalym esi­min tarıhtan óshirmeıtin qun­dy dúnıeler jet­kilikti desek, etnografııalyq mu­rajaıdaǵy al­ǵashqy kórmeniń osyn­daı ǵajap tulǵaǵa arna­lýy­nyń ózinde úlken mán bar. Táýel­sizdik saraıynyń qoldan­baly óner jáne etno­gra­fııa gale­reıa­synyń jetekshisi Tileýkesh Jaý­basova keıingi jas býyn О́.Jánibekov eńbekteri­men sýsyndap ósýi tıistigin tilge tıek etse, ǵalymmen bes jyl birge jumys istegen shákirtteriniń biri, sýretshi, aǵash sheberi Márash Ǵab­­di­l­májıtqyzy 1978-1982 jyl­­dar aralyǵynda «Qazmýzeı­res­tavra­sııa» mamandary qalpyna kel­tirgen tarıhı jádigerlermen ta­nystyrdy. Olardyń ishinde Qy­zylorda mýzeıinde saqtaýly qy­myz ydystarynyń jıyntyǵy, Almatydaǵy demalys parkinen oryn tepken «Túlki men kúlshe» ertegisiniń kóshirmesi, Arys­tan­bab kesenesindegi XV ǵasyrdan qalǵan dińgek, sýretshi Nıkolaı Hlýdov­tyń oryndyǵy, Jánibek batyrdyń qymyz ishken sapty­aıaǵy, Álibek Jangeldınge syı­lan­ǵan dombyra, Sh.Ýálıhanov­tyń inisi Maqy jasaǵan qymyz ojaý sııaqty birtalaı asa baǵaly buıymdar bar. Etnograf ǵalymnyń qazaq sah­na ónerine qosqan úlesi ushan-teńiz ekenin osyndaǵy ulttyq kıimder úlgisinen, mýzykalyq aspaptardan kórýge bolady. El aýzynda saqtalǵan halyq án­deri­niń sırek nusqalaryn qaıta jań­ǵyr­tý­da da ólsheýsiz ter tók­kenine «Sherter», «Sazgen», «Adyrna», «Altynaı», «Arqas» sekildi ózi dúnıege ákelgen folklorlyq-etnografııalyq ansamblderi dá­lel. On saýsa­ǵy­nan óner tam­ǵan sheber-res­tavratorlardy, zer­gerler men qolónershilerdi mýzeı isterine kóptep tartqany osy salanyń búgingi maıtal­man­dary atqaryp jatqan qyrýar isterden de aıqyn ańǵarylyp tu­ratynyn aıta ketý kerek. Qarashash TOQSANBAI.