Baǵasyna qarap oılarsyz. «Moskvıch» bolǵanda ábden minilip, erqashty bolǵan, salabasy shyǵyp kúresinde qalǵan, tot jegen eski qańqasy ǵoı dep. Olaı emes. Jap-jańa. Qazir emes, árıne, buryn. Alǵan kezinde.
Ol kezde Keńes odaǵynyń dúrildep turǵan shaǵy. Basshy, qosshydan qarapaıym eńbek adamy joǵary qurmetteledi. Sozaqtyq dıqan Asaýbaı Baqıev sharýaqor, egistik basynda kún-tún júrýge bar azamat bolatyn. Júgeriligi attyly kisi kirse taptyrmaıdy. Sosıalıstik jarysta júgerisiniń ár gektarynan 129 sentnerden ónim alady. Odaqtan kelgen komıssııa tóbesimen kók tiregen júgeri alqabyn kórip tańǵalǵandarynan biraz ýaqyt bastaryn shaıqap turypty.
Bul – 1980-jyldardyń aıaǵy. Ol kezde Asaýbaı aǵamyzdyń jalyndap turǵan shaǵy. Oǵan komıssııanyń baǵasy emes, óz jumysynyń rahaty kerek. Otbasyn eshnárseden taryqtyrmaýy kerek. Jyldar ótedi. О́nim joǵary. Bir kúni habar keledi. Sosıalıstik jarystyń jeńimpazdaryn qorytyndylaǵan báıgede Asaýbaı Baqıevke «Moskvıch» avtokóligi syıǵa berilipti. Tegin.
Asaýbaı Baqıev aqsaqal: «Poshtaǵa túbirtek úshin 1 som 50 tıyn tóledim. «Moskvıchti» bazardan aıdap qaıttym», deıdi.
Sozaq aýdanyndaǵy Qumkent aýylynyń azamaty Asaýbaı aqsaqal búginde seksenniń seńgirine shyqsa da eńbekten qalmaǵan. Úı irgelik baý-baqshasy kóz qyzyqtyrady.
– Búginde agrotehnıkanyń damyǵan zamany. Tyńaıtqyshtardyń túri de kóp. Sonda da baý-baqshasyna qaraı almaı, aramshópke bastyryp alatyndar jetedi. Al men tyńaıtqyshty bir-aq ret beretinmin. Kún ystyqta sýarýǵa bolmaıdy. Júgeri alqabyna kúzde de, qysta da sý jiberip, qunarlandyryp otyrdym. Osy daqyldy baptaýdyń jaqsy tájirıbesin jınaqtadym. Qazir keńes suraǵan dıqandarǵa bilgenimdi úıretip kelemin. «Eńbek etseń erinbeı, Toıady qarnyń tilenbeı», degen ǵoı uly Abaı atamyz. Al eńbek jasaǵan adamnyń úıinde bereke bar, nesibesi mol. Jumys joq degen jastarǵa qarnym ashady, – deıdi Asaýbaı aqsaqal.
Baqtııar TAIJAN, «Egemen Qazaqstan» Ońtústik Qazaqstan oblysy