«28-31 tamyz kúnderi Atyraý qalasynda ótken sambodan Ishki ister mınıstrliginiń chempıonatynda jalpy komandalyq esep boıynsha Batys Qazaqstandyq qurama komandasy júldeli II orynǵa ıe boldy» dep habarlaıdy Batys Qazaqstan oblysy IID-niń baspasóz qyzmeti.
Birinshilikke Ishki ister mınıstrligi, Ulttyq qaýipsizdik komıteti, Ulttyq Ulan, elimizdiń barlyq oblystyq ishki ister departamentterinen barlyǵy 17 komanda qatysyp, kúsh synasqan.
Boz kilemniń shańyn qaqqan alaman báıgede jalpykomandalyq esep boıynsha birinshi báıgeni Shyǵys Qazaqstan oblysynyń komandasy jeńip alǵan. Taraz qalasynan kelgen komanda júldeli úshinshi orynda.
Aq Jaıyq óńirinde sambo ejelden sambo kúresi jaqsy damyǵan. Búgingi básekede komandasyn alǵa súırep, jekpe-jekte jeńisti eshkimge bermegen myqtylardyń qatarynda BQO IID polısııa qyzmetkerleri Aıbek Ǵabdeshev (74 keli), Baǵdat Jarylǵasov (68 keli) jáne áıgili Erbolat Baıbatyrov (62 keli) bar.
Qazbek QUTTYMURATULY,
«Egemen Qazaqstan»