Keshe Qaraǵandy oblysynyń Shahtınsk qalasyndaǵy «Arselor Mıttal Temirtaý» kompanııasyna tıesili «Qazaqstan» shahtasynda kenet taraǵan metan gazynan úsh adam qaza tapty.
Bul týraly alǵash QR IIM TJK-nyń resmı ókili Rýslan Imanqulov málim etti. Oqys oqıǵadan kóz jumǵan úsh kenshiniń ólimine baılanysty eńbekti qorǵaý qaǵıdalaryn buzylý faktisi boıynsha qylmystyq is tirkeldi. «QR QK 156-baby 4-tarmaǵy «Eńbekti qorǵaý qaǵıdalaryn buzý» boıynsha úsh adamnyń qaza tabý faktisi Sotqa deıingi tergeýdiń biryńǵaı tizilimine tirkeldi», - dep habarlady Qaraǵandy oblystyq ishki ister departamenti baspasóz qyzmetiniń jetekshisi Baqytjan Qudııarov. Onyń aıtýynsha, qylmystyq is toptyq qaıǵyly jaǵdaı faktisi boıynsha ǵana tergelýde. «Is qandaı da bir tulǵaǵa qatysty emes, fakti boıynsha tergelýde», - dedi baspasóz qyzmetiniń jetekshisi. Qaıǵyly oqıǵa 31 tamyz kúni 4 saǵat 21 mınýtta 332 D6-z № 1 jeldetkish túıisiminde oryn alǵan. Apat kezinde shahtada túngi aýysymdaǵy 136 adam bolǵan.
Úsh kenshiniń qazasyn tergeý maqsatynda qurylǵan memlekettik komıssııanyń quramyna úsh qurylym kirgizildi. Metan gazynyń kenet taralýynyń sebebin anyqtaý jáne jumys júrip jatqan qyrtystarda gaz bolýy múmkin ekendigi týraly boljamnyń jasalmaýyna jaýapty laýazymdy tulǵalardy aıqyndaý jumystaryn Investısııalar jáne damý mınıstrliginiń Indýstrıaldyq damý jáne ónerkásiptik qaýipsizdik komıtetiniń, sondaı-aq Eńbekti qorǵaý basqarmasynyń qyzmetkerleri, óndiris jáne ındýstrıaldy-ınnovasııalyq damý basqarmasynyń mamandary júrgizedi. Memlekettik komıssııanyń tergeý nátıjeleri onyń qyzmeti aıaqtalǵannan keıin anyq bolady. Zańdylyqqa sáıkes, komıssııa kenetten metan gazynyń taralýynyń mán-jaıyn 10 kún boıy tekseredi. Qaza tapqan marqum Rýstam Ahmetjanov, Valerıı Rýdenko, Maksım Shebanovtyń eki-úshten balalary jetim qaldy.
«Gaz shahtanyń batys jeldetkish uńǵysynda 614 metr tereńdikte taralǵany anyqtaldy. Áskerılendirilgen apattyq qutqarý qyzmetiniń 49 qyzmetkeri men 9 tehnıka apatty joıý jumystaryn júrgizýge tartyldy. Kompanııa basshylyǵy men qyzmetkerleri qaza bolǵandardyń otbasy men týystaryna qaıǵysyna ortaqtasa kóńil aıtady. Qaza tapqandardyń otbasyna tolyq kólemde kómek kórsetiledi. Jerleý rásiminiń barlyq shyǵyndaryn kompanııa óz moınyna alady», - deıdi kompanııanyń baspasóz qyzmeti.
Mıras ASAN,
«Egemen Qazaqstan»
Qaraǵandy oblysy