Qytaıǵa qarasty Taıvan provınsııasynyń astanasy Taıpeıde XXIX Jazǵy Ýnıversıada-2017 oıyndary aıaqtaldy. 19 tamyzda jalaýy jelbiregen baıraqty básekege álemniń 142 elinen kelgen 7600-den astam stýdentter sporttyń 21 túri boıynsha synǵa túsken bolatyn.
Qazaqstan ulttyq quramasynyń sportshylary sporttyń 14 túri boıynsha el namysyn qorǵady. Bıylǵy Jazǵy Ýnıversıadanyń qorytyndysy boıynsha, 120-ǵa jýyq sportshymyz 3 altyn, 6 kúmis jáne 7 qola júlde ıelendi. Jalpykomandalyq esepte bizdiń stýdentter 16 medalmen 21-shi orynǵa turaqtady. Sondaı-aq, Qazaqstan quramasymen birdeı medal jınaǵan Túrkııa quramasy 20-shy orynǵa jaıǵasqan. Túrikter bizden kúmis júlde esebi boıynsha alǵa shyqqan. Bul synda Japonııa quramasy birinshi boldy. Kúnshyǵys eli stýdentteriniń enshisinde 101 medal bar (37 altyn, 27 kúmis jáne 37 qola). Ońtústik Koreıa sportshylary 82 júldemen (30, 22, 30) ekinshi orynda tur. Al jarystyń sońǵy kúninde Reseı quramasyn medal boıynsha basyp ozǵan Taıvan sportshylarynyń qorjynynda 90 medal bar (26, 34, 30).
Osydan eki jyl buryn Ońtústik Koreıanyń Kvandjý qalasynda ótken XXVIII Jazǵy Ýnıversıada oıyndarynda qazaq sportshylary 10 medal ıelenip, jalpykomandalyq esepte 11-shi orynnan kóringen bolatyn. Sol jyly stýdent sportshylarymyz 6 altyn men 4 qolany qurama qorjynyna salǵan edi. Al birinshi oryndy Ońtústik Koreıa sportshylary 108 medalmen (47 altyn, 32 kúmis jáne 29 qola) ıelengen-di.
Eki jyl saıyn turaqty túrde uıymdastyrylyp turatyn stýdentterdiń kelesi ýnıversıadasy 2019 jyly Italııanyń Neapol qalasynda ótedi.
Álı BITО́RE, «Egemen Qazaqstan»