Bıyl Astanada Beıbitshilik jáne Kelisim saraıynda balalar men jetkinshekterdiń qoǵamdyq qabyldaý bólmesi ashyldy. Balalar quqyqtary jónindegi ýákilet janynan ashylǵan qoǵamdyq qabyldaý jumysyna «Samruk-Kazyna Trust» áleýmettik jobalardy damytý qory demeýshilik kórsetip otyr.
Balalar quqyqtary jónindegi ýákiletiniń qoǵamdyq qabyldaý qyzmetiniń basty maqsaty – óskeleń urpaqtyń quqyqtary men múddelerin qorǵaýshylardyń barlyǵyn biriktiretin aqparattyq-keńestik ortalyǵy retinde jumys istep, bala quqyǵy boıynsha qoǵamda qordalanyp qalǵan negizgi máselelerdi sheshýge atsalysý. Egemen.kz ortalyqtyń jumys isteý barysymen tanysyp qaıtty. Bizdi qarsy alǵan BUU Balalar qory ulttyq keńesshisi Aıash Mákenova ortalyqtyń jumys isteý tártibi men mańyzy týraly áńgimelep berdi.
Onyń aıtýynsha, Qazaqstandaǵy bala quqyǵy turǵysynan birneshe mańyzdy máseleler bar. «Bala quqyǵyn qorǵaý boıynsha memlekettik baǵdarlamalar men josparlardy qurý kezinde azamattyq uıymdar men memlekettik mekemeler arasynda birlesken is-qımyl jetkilikti deńgeıde oryndalmaıdy. Sonymen birge balalar quqyǵy buzylý boıynsha naqty derekter men sebepteri anyq kórsetilmeı jatady» degen keńesshi bala máselesine qatysty birqatar derekterdi alǵa tartty.
«Qazaqstanda búgingi kúni 5,5 mıllıon bala bar. Olardyń 2,5 mıllıony mektep jasyna deıingi, 2,8 mıllıon bala mektep jasynda, 220 myń jas joǵarǵy oqý ornynda bilim alyp jatyr. Qazaqstan Respýblıkasy Bala quqyqtary jónindegi ýákildiginiń málimetinshe elimizde 29 myń bala ata-ana qaraýynsyz jetim qalǵan bolsa, oralman statýsynda 11 myń bala, múmkindigi shekteýli 141 myń bala bar», deıdi BUU Balalar qory ulttyq keńesshisi.
Aıta keteıik, Balalar quqyqtary jónindegi ýákilet 2016 jylǵy 10 aqpan kúngi Prezıdent N.Nazarbaevtyń №192 jarlyǵy boıynsha quryldy. Instıtýttyń normatıvtik quqyqtyq bazasyn daıyndaýda Bilim jáne ǵylym mınıstrliginiń bala quqyǵyn qorǵaý komıteti, Qazaqstan Respýblıkasy Prezıdentiniń memlekettik-quqyqtyq ákimshilik bólimi, Premer-mınıstrdiń zań bólimi belsene atsalysty. El Prezıdentiniń 2016 jylǵy 25 naýryz kúngi taǵaıyndamasymen Bala quqyqtary jónindegi ýákili retinde Parlament Májilisiniń depýtaty Zaǵıpa Balıeva bekitildi.
Qoǵamdyq qabyldaý úshin Beıbitshilik jáne Kelisim saraıynan aýmaǵy 100 sharshy metr bolatyn arnaıy 4 kabınet berilgen. Azamattardy qabyldaýǵa ońtaılandyrý maqsatynda qoǵamdyq qabyldaý bólimi birinshi qabatqa kireberiske ornalastyrylǵan. Odan bólek kishkentaı balalar úshin arnaıy oıyn alańy da jumys isteıdi.
Bala quqyǵyna qatysty qońyraý qabyldaıtyn «111» baılanys nómiri pılottyq rejımde táýlik boıy úzdiksiz jumys isteıdi. Sońǵy málimetter boıynsha, kúnine orta eseppen 3 myńnan astam qońyraý túsedi. Ásirese Qaraǵandy oblysy, Almaty oblysy, ShQO oblysynan habarlasqan azamattardyń sany basym eken. Mamannyń aıtýynsha, bala quqyǵy boıynsha negizgi máseleleriniń biri – órt qaýipi men jol-kólik apaty. 2016 jylǵy málimet boıynsha, jol-kólik apatynan 169 bala qaıtys bolsa, 3159 bala jaraqat alǵan. Al órt saldarynan 159 bala qaza taýyp, 3096 bala zardap shekken. Osy negizde balalar men jetkinshekter Qoǵamdyq qabyldaýǵa el azamattary ózderiniń jazbasha nemese aýyzsha ótinishterin, balalar quqyqtaryn qorǵaý salasyn damytý boıynsha usynystaryn qaldyra alady. Barlyq ótinishter saraptalyp, tıisti sheshimder qabyldanatyn bolady.
NAZAR AÝDARYŃYZ!
111 senim telefonyna qońyraý shalyp, qandaı máselelerdi sheshýge bolady?
Balalar quqyqtary jónindegi ýákildiń Qoǵamdyq qabyldaýy Ombýdsmen men óskeleń urpaq kezdesetin turaqty ortalyqqa aınalady. Bul jerde balalar men jastarǵa qatysty ózekti máseleler talqylanyp, eldegi balalar men jastar ómiriniń ártúrli aspektileri boıynsha pikir almasý ótedi. Qoǵamdyq qabyldaý aıasynda respýblıkadaǵy balalar úılerimen tyǵyz qarym-qatynas ornatylyp, ondaǵy balalarǵa kórsetiletin qyzmet sapasy saraptalady.
«Balalar úıindegi qaýipsizdik qyzmetin jiti baqylaý úshin respýblıka boıynsha 260 vıdeokamera ornatylý kerek. Jergilikti uıymdar nusqaýlyqty oryndaýǵa kiristi. Qanshalyqty nátıjeli bolatynyn kútemiz», deıdi Balalar quqyqtary jónindegi ýákil Zaǵıpa Balıeva.
Mundaı qoǵamdyq bastamalardan bólek, ınstıtýt aıasynda balalar men jetkinshekterdiń quqyǵy men mindetterin túsindiretin túrli semınar-trenıngter ótip turady. Osy turǵyda balalar men jetkinshekter atalǵan uıymǵa óz quqyqtary men múddelerin qorǵaıtyn ókil retinde qarap, memlekettik organdar, mınıstrlikter men Úkimetke ótinishterin bildirýge múmkindik ala alady. Sondaı-aq balalar ombýdsmeni balalar máseleleri men múddelerine qatysty jaǵdaılardy balalardyń óz aýyzdarynan estip, jaǵdaıǵa baılanysty oń sheshim tabýǵa yqpal etpek. Qoǵamdyq qabyldaý barlyq deńgeıdegi bilim berý mekemelerin, stýdentter men eriktilerdi yntymaqtastyqqa shaqyrady.
Aıa О́MIRTAI,
«Egemen Qazaqstan»