EKSPO-2017 kórmesi márege taıady

Eske salsaq, belgilengen úsh aı merziminde EKS­PO-2017 kórmesine shamamen 2 mıllıon adam keledi dep josparlanǵan bolatyn. Degenmen, bul boljam eki aıǵa jýyq ýaqytta-aq jú­zege asty. Naqtysynda, 4 tamyz kúni halyqaralyq mamandandyrylǵan kórme eki mıllıonynshy kelýshini qarsy alyp úlgerdi. Al 25 tamyzda EKSPO-2017 kór­mesine úsh mıllıonynshy ke­lýshi tirkeldi. Kórmeni tama­shalaýshylardyń basym bó­ligi Qazaqstannyń Ulttyq pavılony – «Nur Álemge» aı­ryqsha qyzyǵýshylyq ta­nytqan. Nátıjesinde, tamyzda EKSPO-2017 kór­me­si­niń basty nysanyna kelý­shi­ler sany mıllıonnan asyp tústi. 

Resmı derekke súıensek, EKSPO-2017 kórmesine kelý­shilerdiń 15 paıy­­zyn shetel­dik qonaqtar quraıdy, onyń basym bóligi reseı­lik kelý­shi­ler. Bul jó­ninde «Astana EKSPO-2017» UK» AQ tóraǵasy Ahmetjan Esimov málim­dedi. 

– Josparlanǵan mejege jettik, EKSPO-2017 kór­me­si­niń basty maq­sat­tarynyń biri týrıstik salanyń qar­qyndy damýyna yqpal etý bolatyn. Boljam oryndal­dy. Jumys oryndary kó­beıip, tabys kólemi artty. Ásirese, shaǵyn jáne or­ta bıznes salasynda mýltıplekatıvtik áser jaq­sy baıqaldy. El­ordalyq qonaq­úılerdegi meı­­mandar sany eki ese kóbeı­di. Dál osyn­­daı kórset­kish meıramha­nalar men qo­ǵam­dyq tamaqtaný oryndarynda da baıqa­lady, – deıdi Ulttyq kompanııa basshysy.

Sondaı-aq, Ahmetjan Esimov ja­qynda EKSPO-2017 kórmesi nysan­daryn paıdalaný jospary bekitil­genin jetkizdi. Kórme jumysy aıaqtal­ǵannan keıin, EKSPO aýmaǵynda pro­fı­laktıkalyq jumystar júrgizilip, negizgi nysandardyń jumysy bastalady.

Jahandyq energetıkalyq tóń­keris­tiń ozyq tehnologııalary pash etilgen tarıhı alań  – «Astana EKSPO-2017» kórmesi úsh aı boıyna talaı jaqsy­lyq­tyń jarshysy boldy. Tipti adamzat úshin ári mol, ári arzan energetıka kó­zin ashatyn tóńkeris EKSPO-2017 kór­mesiniń pa­vılondaryndaǵy ozyq jobalar men jańa tehnologııalar tú­rinde Astanadan bastaý aldy deýge bolady. Qanshama eldiń ulttyq kún­deri ózkizilip, qala qonaqtary men turǵyn­dary erekshe elderdiń rýhanı-mádenı sharalarynan sýsyndady. 

Ulttyq kúnderdiń ótkizilýi aldaǵy alty kúnde de jalǵasyn tappaq. Má­selen, 5 qyrkúıek – О́zbekstannyń, 6 qyrkúıek – Birikken Arab Ámirlikteriniń,  7 qyrkúıek – Polshanyń, 8 qyrkúıek Reseı Federasııasynyń ult­tyq kúnderi sherý tartady. Al 9 qyrkúıek kúni ulttyq kún sahnasynda sońǵy konserttik baǵdarlamalardyń birin Halyqaralyq kórmeler bıýrosy uıymdastyrady. 10 qyrkúıek kúni kongress-ortalyqta kórmeniń resmı jabylý saltanaty ótkizilip, konserttik bólimi amfıteatr­da jalǵasady.

Dınara BITIK, «Egemen Qazaqstan»