Senbi kúni Astanada salynyp jatqan «Abý-dabı plaza» ǵımaratynyń qurylys alańynda kúzet kompanııasynyń qyzmetkerleri men sheteldik jumysshylar (Úndistan azamattary) arasynda turmystyq sıpattaǵy janjal oryn alǵan bolatyn.
Oqıǵa ornyna memlekettik qurylymdar men quqyq qorǵaý organdarynyń ókilderi kelip, jedel sharalar arqyly oqıǵanyń aldy alyndy. Alaıda, birqatar azamattar qoǵamdyq tártipti buzyp, jaǵdaıdy ýshyqtyrmaqshy bolǵan. Esil aýdandyq prokýrory tártip buzýshylardyń jaýapqa tartylatyny týraly resmı eskertý jasady.
Ishki ister mınıstrligi Memlekettik til jáne aqparat departamenti ókiliniń habarlaýynsha, janjal Úndistannan kelgen mas jumysshyny kúzetshi nysan aýmaǵyna kirgizýden bas tartqannan keıin týyndaǵan. Osydan keıin ol otandastaryn shaqyryp, kúzetshini soqqyǵa jyqqan. Jergilikti jumysshylar bolsa, kúzetshige bolysyp, sonyń saldarynan tóbeles týyndap, oǵan shamamen 30 adam qatysqan. «Ishki ister organdary keleńsizdikterdiń aldyn alýǵa baǵyttalǵan sharalar júrgizdi. Turǵyndardyń orynsyz áreketterge barmaýyn jáne tekserilmegen aqparatqa senbeýin suraımyz. Qazirgi tańda jaǵdaı qalypty jáne polısııanyń tolyq baqylaýynda», – dep habarlaıdy joǵaryda atalǵan departament ókili.
Aqparat jáne kommýnıkasııalar mınıstri Dáýren Abaev bul jaǵdaıdyń ultaralyq sıpattaǵy janjal emes ekenin aıtyp, halyqty dúrlikpeýge, sabyr saqtaýǵa shaqyrdy. Sondaı-aq, áleýmettik jeli qoldanýshylardan arandatýshylyq sıpattaǵy jalǵan aqparattar taratpaýdy surady. «Qazirgi kezde bul kıkiljiń tolyǵymen sheshildi. Bizdegi málimetter boıynsha janjaldan zardap shekkender joq. Turǵyndardyń alańdaýyna da esh negiz joq ekenin, barlyq máseleniń beıbit jolmen sheshiletinin aıtqym keledi», dep atap kórsetti mınıstr.