Oqyrman...
...úlgi tutady
Ulttyq oıyn ulyqtaldy
Mańǵystaý aýdandyq jastar resýrstyq ortalyǵynyń bastamasymen jáne aýdandyq bilim úılestirý ortalyǵynyń qoldaýymen ulttyq toǵyzqumalaq oıynynan jastar arasynda týrnır bolyp ótti. Jarystyń maqsaty – Mańǵystaý sportshylarynyń dańqty dástúrlerin jalǵastyrý, jastar arasynda toǵyzqumalaqty nasıhattaý, tatýlyqty nyǵaıtý, salaýatty ómir saltyn qalyptastyrý, olardy patrıottyqqa tárbıeleý, jas sportshylardyń sheberligin arttyrý. Jarysqa 1999-2002 jyldary týǵan qyzdar men uldar qatysty. Aýdan boıynsha barlyq aýyldardyń komandalary belsendi bolyp, ásirese Tushyqudyq, Jarmysh, Jyńǵyldy aýyldarynan kelgen komandalar oıyndary tartysty ótti.
Jarystyń máresinde birinshi oryndy Jarmysh aýylynyń «Jarmysh qyrandary» komandasy ıelense, ekinshi oryndy shetpelik «Alshyn ulandary», al úshinshi oryndy «Tushyqudyq tarlandary» komandasy mise tutty. Belsendi jastar yntalandyrý syılyqtaryna ıe boldy.
Allabergen QONARBAEV Mańǵystaý oblysy, Mańǵystaý aýdany
...qynjylysyn jetkizedi
Aýyldan kóship ketýshiler kóp
Bizdiń aýylymyz Keńqııaq kentinen ońtústik shyǵysqa qaraı úsh shaqyrym jerde ornalasqan. Irgemizge koreılerdiń basqarýyna berilgen munaı-gaz kompanııasy tıip tur. Alaıda aspannan shuǵa jaýsa, odan qulǵa ultaraq ta tımeıdi» degendeı, kógildir otynnyń ıgiligin kóretin túrimiz joq. Osy baǵytta jergilikti ókiletti organdarǵa aıtqan ótinish-tilekterimiz aıaqsyz qalyp qoıa beredi.
Búgingi zaman burynǵydaı qı, kómir, aǵash jaǵyp otyratyn kez emes. Biz turatyn Báshenkól aýyly sýy tushy, ejelden mal ustaýǵa qolaıly eldi meken bolatyn. Alaıda aýyldaǵy bastaýysh mekteptiń jabylý qaýpi týyp otyrǵandyqtan ári otyn jaǵý mashaqatynyń aýyrlyǵyna baılanysty ózge jaqqa kóship ketýshiler qatary azaıar emes. Buryn 200-ge tarta tútini bar irgeli aýyl edik. Qazir sodan nebári 13 tútin ǵana qalyp otyrmyz. Olardyń bári ózim sekildi kóship-qonýǵa jaǵdaılary kele bermeıtin jasy ulǵaıǵan adamdar. Bizdiń osy janaıqaıymyzǵa qulaq asatyn bireý tabylar ma eken?
Qaljan KО́PTILEÝOVA, Báshenkól aýylynyń turǵyny Aqtóbe oblysy, Temir aýdany
...qaýip etedi
Dinı aǵym jarǵa jyǵady
Aýyldaǵy bir áýlettiń aıalap otyrǵan qyzy turmysqa shyǵyp, qosaǵy ustanǵan dinı aǵymǵa kirýine týra kelgen. Sonyń jaqynda kúıeýi qaıtys bolyp, álgi jigittiń «tamyrlastary» qaıǵy jamylǵan úıde jylaýǵa tyıym salyp, tez arada jerleýge buıryq bergen. Qazaq halqy marqumdy shyǵararda alystaǵy et jaqyn, aǵaıyn-týys, tamyr-tanystary kelmeıinshe eki kúndeı kútedi emes pe?.. Onymen qoımaı, kúıeýiniń búkil jora-joldastary álgi áıeldi yqtııarynsyz teris jolda júrgen taǵy bir azamatqa turmysqa beripti...
Qoǵamda dinı nanym-senimdi burmalaýshylar saqal qoıyp, qysqa shalbar kıinip, ózderin taza ıslam dininiń beldi múshesi sanaıtyn osyndaı azamattar erteń qandaı urpaq tárbıeleıdi?! Taptaýryn bolǵan taǵdyr, tas-talqany shyqqan otbasylar osydan shyqpasyna kim kepil?! Qazirgi almaǵaıyp zamanda teris dinniń jetegine erip, jıhad atyn jamylyp, shetel asyp ketken qandastardyń qylyǵy jambasymyzǵa jaradaı batatyny taǵy bar. Adam balasy kináni dinnen emes – ózinen izdep, óz-ózin tárbıelep otyrsa, mundaı soraqy qylyqtar jasamas edi. Jalǵan dinniń jetegine ergenderdi der kezinde durys jolǵa qoǵam bolyp burmasaq, basqalardy jat aǵymǵa úgitteýge tyrysatyny anyq.
Aıman MUQYShEVA ASTANA
...ótinish aıtady
Ártisterden qatty qysyldyq...
Biz Qyzylorda oblysy, Aral aýdany, Qarashalań aýylyndaǵy mádenıet úıinde jergilikti jastardan quralǵan ónerpazdar túrli sharalar uıymdastyryp, turǵyndardyń kóńilderin kóterýdi dástúrge aınaldyrǵanbyz. Alaıda, bizdiń kóńilimizdi qynjyltatyn másele – aýylymyzdaǵy mádenıet úıi sanalatyn klýbymyzdyń syn kótermeıtin jaǵdaıy. Ásirese, qys mezgilinde klýbqa qansha ot jaqqanmen esh jylymaıdy.
О́tkende aýdandyq bilim bóliminen aýylymyzǵa «Taqııa men mafııa» teatry kelip óner kórsetedi degen habar jetti. Shalǵaıdaǵy aýylǵa ártisterdiń keletini bizdi qatty qýantqanymen, syn kótermeıtin aýyl klýbynyń jaǵdaıyn oılap biraz ábigerlenip qalǵanymyz ras. Sóıtip, ártisterdiń ónerin aýylymyzdaǵy №75 orta mekteptiń akt zalynda tamashaladyq.
Konsertten keıin teatr ujymy taǵy da kelip óner kórsetýlerin suraǵan tilegimizge aldaǵy ýaqytta úlken qoıylym ákelýge ýáde berip tarasty. Tek sol kezge deıin klýbymyzdyń jaǵdaıy jaqsaryp, basshylyq aýyl turǵyndarynyń ótinishine qulaq asyp, qolǵa alynsa eken deımiz.
Aıgúl KÚZENOVA Qyzylorda oblysy
...renish bildiredi
Sosıalızmmen qoshtasa almaı júr
Osy ýaqytqa deıin baspasóz betterinde kóshe ataýlaryn qazaqshalaý jaıynda talaı ret oqyrmandar óz pikirin bildirip keledi. Qarap otyrsańyz, qazaq jerinde áli kúnge qazaqsha ataý ala almaı kele jatqan kóshe, aýyl, aýdan attary jeterlik eken. Solardyń biri – Jetisaı qalasyndaǵy 70 myńǵa jýyq turǵyny bar Lenın kóshesi. Qazaqstan táýelsiz el atanǵanyna 25 jyldan assa da Jetisaı qalasy sosıalızmmen qoshtasa almaı júr. Meniń mysalǵa alyp otyrǵanym – tek bir ǵana kóshe (turǵyny eń kóp kósheni aıtyp otyrmyn). Senseńizder de, senbeseńizder de osy aýdannyń Myrzakent kentinde Iýjnyı, Vostochnyı, Energetık, Aptechnyı degen maǵynasyz kóshe ataýlary da bar.
Joǵarydaǵy basshylyq tarapynan jekelegen kósheler men nysandardyń attaryn ózgertý týraly qaýly-qararlar, tapsyrmalar joq emes, bar eken. Biraq aýdan, qala ákimdikteri bul tapsyrmany ázirshe qaperlerine ala qoımaǵan sııaqty.
О́sken PISTEBEK
Ońtústik Qazaqstan oblysy, Maqtaaral aýdany