Búgin Ońtústik Qazaqstan oblysynyń ákimi Janseıit Túımebaevtyń tóraǵalyǵymen aýdan, qala ákimderimen jáne oblystyq basqarmalar basshylarynyń qatysýymen selektorlyq májilis ótti. Kún tártibinde «Oblysta energoúnemdeý jáne energotıimdilikti arttyrý jumystarynyń barysy» men «Oblys aýmaǵyndaǵy eldi mekenderdi abattandyrý, kógaldandyrý jáne sanıtarlyq tazalyq sharalary» týraly eki másele qaraldy.
Kún tártibindegi máselege kóshpes buryn óńir basshysy barsha aýdan, qala ákimderi men basqarma basshylaryna búgingi altynshy shaqyrylǵan Parlamenttiń úshinshi sessııasynda sóılegen Elbasy Nursultan Nazarbaevtyń baıandamasymen tanysyp, qoıylǵan mindetter boıynsha naqty josparlar jasaýdy tapsyrdy.
Jańa oqý jylynyń bastalǵanyn aıtqan aımaq basshysy bilim berý mazmunyna, oqýshy men pedagog tulǵasyna jáne qyzmetine basa nazar aýdarý qajettigin aıtty. Sonymen qatar, oblystaǵy muǵalimderdi qyzmettik pátermen qamtý úshin barlyq aýdan,qalalardan tıptik úlgidegi turǵyn úıler salýdy qolǵa alý kerektigin atap ótti. Bul baǵyttaǵy jumystardy úılestirýdi qurylys basqarmasyna júktedi.
Kún tártibindegi birinshi másele boıynsha baıandama jasaǵan oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Marǵulan Maraıym óńirde energo aýdıt júrgizý isi kesheýildep otyrǵandyǵyn aıtty. Onyń aıtýynsha, oblysta 103 nysannyń tek 48-ne ǵana energo aýdıt júrgizilgen. Iаǵnı, 55 mekemede búgingi kúnge deıin energo aýdıt júrgizilmeı, «Energııa únemdeý jáne energııa tıimdiligin arttyrý týraly» zań talaptary óz deńgeıinde oryndalmaı otyr.
Osy máselege mán bergen oblys ákimi aýdıt júrgizý jónindegi tıisti jumystardy aǵymdaǵy jyldyń sońyna deıin atqarýdy tapsyrdy.
«Shymkent qalasynda balamaly kózderdi (kún sáýlesinen) paıdalana otyryp, elektr qýaty men tabıǵı gazdy únemdeý úshin kópqabatty turǵyn úılerge sý jylytý qurylǵylary ornatylýyn tapsyramyn. Tapsyrmany qatań baqylaýda ustaý qajet», - dedi Janseıit Qanseıituly.
Májiliste sondaı-aq oblys aýmaǵyndaǵy eldi mekenderdi abattandyrý, kógaldandyrý jáne sanıtarlyq tazalyq sharalary talqylandy. Bul rette oblys ákiminiń kórshiles oblystar men sheteldiń oń tájirıbesin qoldanysqa engizý jónindegi tapsyrmasynyń oryndalý barysy sóz boldy. Desek te, kósheni tazalaý, beı bereket kúl-qoqystardy joıý jáne úı qasbetterin ákteý, syrlaý boıynsha tapsyrmalardyń oryndalýy baıaý. Atap aıtqanda, kóshe boılaryn tazalaý boıynsha jospar Shymkent qalasynda – 30 paıyzǵa, Otyrarda – 31, Ordabasyda – 38, Maqtaaralda– 40, Arysta – 42, Shardara aýdanynda 49 paıyzǵa ǵana oryndalǵan.
Tazalyqty qamtamasyz etý jóninde Shymkent qalasy ákiminiń orynbasary Beısen Janbosynovqa syn eskertpeler aıtylyp, birqatar tapsyrmalar júkteldi.
«Búginde Shymkent qalasynda tazalyqty qamtamasyz etetin 3 mekeme bar, onda bir myń adam jumys isteıdi jáne 203 tehnıka bar. Alaıda osyǵan qaramastan tazalyqty qamtamasyz etý jumystary kóńil kónshitpeıdi. Bul jaǵdaı oblys ortalyǵy úshin óte uıat. Tıisti qorytyndy shyǵaryńyzdar»,-dedi ákim.
Májilisti qorytyndylaǵan óńir basshysy oblys boıynsha kondomınıým men páter ıeleriniń kooperatıvterin qurý jumystaryn jedeldetip, otyrǵyzylǵan tal-daraqtardy kútip-baptaý máselelerine asa mán berýdi tapsyrdy.