Búgin oblys ákimi J.Túımebaevtyń tóraǵalyǵymen oblystyq tótenshe jaǵdaılardyń aldyn alý jáne joıý komıssııasy otyrysynyń kezekti májilisi ótti. Jıynǵa komıssııa músheleri, aýdan, qala ákimderi men jaýapty baskarma basshylary qatysty.
Kún tártibinde sý tasqyny qaýipin aldyn alý jáne joıý boıynsha 2017-2020 jyldarǵa arnalǵan «Jol kartasy» jobasyna engizilgen 1-kezeńdik is-sharalardyń júzege asyrý barysy talqylandy. Bul týraly oblystyq aýyl sharýashylyǵy basqarma basshysynyń mindetin ýaqytsha atqarýshy Turǵanbek Ospanov baıandama jasady.
Onyń aıtýynsha, óńirdegi sý tasqynyna qarsy ınjenerlik 98 is-shara atqarylyp, sý jınaqtaý kólemi 342,75 mln. sharshy metrdi quraıtyn 30 shaǵyn sý qoımasy aıqyndalypty. Nátıjesinde 12 nysan boıynsha jobalaý smetalyq qujattama ázirlengen. Bıyl jergilikti bıýdjetten 2 nysanǵa 174, 2 mln. teńge bólinse, qalǵan 10 nysanǵa 960,98 mln. teńge qarastyrylǵan. Alaıda respýblıkalyq jol kartasyn bekitý kezinde Ońtústik Qazaqstan oblysy boıynsha 29 nysan engizilmeı qalǵan. Osy qalǵan 29 nysan boıynsha oblystyq deńgeıde arnaıy is-sharalar kesheni ázirlenip, oblystyq bıýdjetten 2,1 mlrd. teńge bólingen. Jalpy quny shamamen 6,3 mlrd. teńge bolatyn 30 shaǵyn sý qoımasynyń qurylysyn júzege asyrý II - kezeńnen turady. Búgingi kúni atalǵan jospardyń birinshi kezeńinde jalpy quny 3,8 mlrd. teńge bolatyn 5 jobany iske asyrý josparlanǵan.
Kún tártibindegi ekinshi másele - oblys aýmaǵyndaǵy seısmıkalyq qaýipsizdikti qamtamasyz etý týraly oblystyq energetıka jáne turǵyn úı-kommýnaldyq sharýashylyq basqarmasynyń basshysy Marǵulan Maraıym baıandama jasady. Onyń aıtýynsha, jalpy oblysymyzda 3253 kópqabatty turǵyn úı bar. Onyń búginde 1393-i kúrdeli, 1035-i aǵymdaǵy jóndeý jumystaryn qajet etedi. Al, tehnıkalyq zertteý qorytyndysyna saı oblysta qaıta qalpyna keltirýge jatpaıtyn apatty 14 úı bar. Budan bólek, 18 úıdiń seısmo jaǵdaıyn nyǵaıtý qajet. Bıyl 7 úıge oblystyq bıýdjet esebinen 753,0 mln. teńge bólinipti.
Kún tárbibindegi úshinshi másele - asa qaýipti juqpaly aýrýlardyń aldyn alý. Bul týraly Ońtústik Qazaqstan oblysynyń qoǵamdyq densaýlyq saqtaý departamentiniń basshysy Nurbek Nyshanov jan-jaqty baıandady. Oblysymyzda kene shaǵý jaǵdaılary byltyrǵy jylmen salystyrǵanda 28,9 paıyzǵa tómendegen.
Jıyndy qorytyndylaǵan oblys ákimi jaýapty basqarma basshylary negizgi úsh másele týraly naqty tapsyrmalar júktedi.
«Aýdan, qala bıýdjeti esebinen arnaıy baǵdarlama ashyp, avarııalyq jáne eski turǵyn úılerdi buzýdy jáne seısmonyǵaıtý jumystaryn kúsheıtý qajet. Bul rette qurylys sapasy qatań qadaǵalaýǵa alynýy tıis», - dedi Janseıit Qanseıituly.
Sondaı-aq ákim oblysymyzdaǵy asa qaýipti juqpaly aýrýlardyń aldyn alý jumystaryna myqtap mán berýdi tapsyrdy. Bul rette kóshelerde sút jáne et ónimderiniń baqylaýsyz satylýyna jol berilmeýi kerektigi júkteldi.