Aqtóbede Qazaqstan respýblıkasy men Qytaı halyq respýblıkasynyń munaı-gaz salasyndaǵy yntymaqtastyǵynyń 20 jyldyǵyna arnalǵan saltanatty shara ótti. Oǵan oblys ákimi Berdibek Saparbaev, energetıka vıse-mınıstri Áset Maǵaýov, «KAZENERGY» assosıasııasy tóraǵasynyń orynbasary Uzaqbaı Qarabalın men CNPC korporasııasynyń vıse-prezıdenti Van Dýn Szın qatysty.
1997 jyly eki el arasyndaǵy kelisim aıasynda Qytaı ulttyq munaı-gaz korporasııasynyń (CNPC) alǵashqy ınvestısııalyq jobasyna aınalǵan «Aqtóbemunaıgaz» AQ quryldy. Osylaısha, Qazaqstan men Qytaıdyń munaı-gaz salasyndaǵy yntymaqtastyqtyǵynyńtarıhy bastaldy.
- Táýelsizdik alǵan alǵashqy jyldary Qazaqstan úshin negizgi mindetterdiń biri - halyqtyń ál-aýqatyn qamtamasyz etý boldy, bul úshin jer qoınaýynyń baılyǵyn ıgerý talap etildi. Prezıdentimiz júrgizip otyrǵan dana saıasatynyń arqasynda sol bir qıyn jyldary biz Chevron, Agip, British Petroleum jáne taǵy basqa iri álemdik kompanııalardy tarta aldyq. Olar ekonomıkaǵa, halyqqa kómektesti. Aqtóbe jerine alǵash bolyp kelgen ınvestor kompanııalardyń qatarynda CNPC korporasııasy boldy. Táýelsizdik alǵan sátten bastap Qytaı Qazaqstannyń negizgi seriktesteriniń biri boldy jáne sodan beri bizdiń elderdiń saıası, ekonomıkalyq baılanysy nyǵaıa túsýde,-dedi B.Saparbaev.
Oblys ákimi ótken 20 jyldyń ishinde «SNPS-Aqtóbemunaıgaz» AQ óńirdiń ekonomıkasyn damytyp, halyqtyń ál-aýqatyn jaqsartý úshin kóp nárse jasaǵanyn atap ótti. Buǵan elimizge kelgen ınvestısııalar, jańa tehnıka men tehnologııalar, salynǵan zaýyttar dálel. Sonymen, yntymaqtastyq etken jyldardyń ishinde kompanııa 100 mln tonna munaı men 51 mlrd tekshe metr gaz óndirip, ınvestısııa 13 mlrd teńgeni qurady.
Sondaı-aq, kompanııa bıznestiń áleýmettik jaýapkershiligi aıasynda Aqtóbede quny 1,5 mlrd. teńge bolatyn jastar saraıynyń qurylysyn aıaqtamaq. Oblys aýdandarynda júzege asyrylǵan áleýmettik nysandar az emes.
- Biz ekonomıkany damytý úshin ınvestısııa kólemin arttyrýdyń mańyzdy ekenin túsinemiz. Kompanııanyń bıylǵy ınvestısııalyq jospary 90 mlrd teńgeni quraıdy, bul 2016 jylǵy kórsetkishten eki ese kóp. Oblys basshylyǵy atynan Qazaqstan men Qytaı halyq respýblıkasy arasyndaǵy munaı-gaz yntymaqtastyǵyna 20 jyl tolýymen quttyqtaımyn. Basty tilek – elderimizdiń baıyrǵy tatý kórshilik qarym-qatynasy órkendep, nyǵaıa bersin,-dep sózin túıindedi oblys ákimi.
Jıyn sońynda Qazaqstan men QHR-nyń munaı-gaz salasyndaǵy 20 jyldyq yntymaqtastyǵyna arnalǵan sımvolıkalyq eskertkish ashyldy.