Elordada Qazaqstan Respýblıkasynyń Prezıdenti Nursultan Nazarbaev pen Polsha Respýblıkasynyń Prezıdenti Andjeı Dýdanyń qatysýymen Qazaqstan-Polsha bıznes-forýmy ótti.
Elimizdiń Investısııa jáne damý mınıstrligi, «Atameken» QR Ulttyq kásipkerler palatasy, sonymen qatar Ulttyq palatanyń enshiles uıymy Qazaqstannyń Sytqy saýda palatasy muryndyq bolǵan alqaly jıynǵa sharaǵa eki memlekettiń iri kompanııalarynyń basshylary, bıznestiń 450-ge tarta ókili qatysqanyn atap ótken jón.
Halyqaralyq bıznes-forýmda sóz sóılegen Qazaqstan Prezıdenti bul sharanyń Polsha Prezıdentiniń elimizge saparynyń aıasynda ótkizilip otyrǵanyn aıtty. Sonymen qatar, Elbasy Qazaqstanda Polsha kásipkerlerine jumys isteýge barynsha qolaıly jaǵdaı jasalyp otyrǵanyna toqtaldy.
– Qazaqstandaǵy Polsha azamattary vızalyq talaptardan bosatylǵan. Polsha tarapy da osyndaı sheshim qabyldaǵanyn qalaımyz. О́zderińiz biletindeı, Qazaqstan Eýrazııanyń júreginde ornalasqan, Uly Jibek jolynyń mańyzdy bóligi bolyp tabylady. Sol sebepti Qytaı Halyq Respýblıkasynyń ıdeıasyn («Bir jol - bir beldeý» - avt.) qoldadyq. Oǵan qosylyp qana qoımaı, Uly Jibek jolyn keńinen damytýǵa at salystyq. Qytaı shekarasynan Kaspıı teńizine deıin avtoban saldyq. Reseı arqyly Eýropaǵa shyǵatyn temirjol jelisi taǵy bar. Budan bólek, ońtústikke qaraı baratyn temirjol tóseldi. Onymen Iran arqyly Parsy shyǵanaǵyna shyǵýǵa múmkindik bar. Atalǵan baǵyttardy qytaılyq áriptesterimiz de emin-erkin paıdalana alady. Al Polsha bolsa Eýropanyń kindiginde ornalasqan. Iаǵnı, bizdiń geografııalyq ornalasý jaǵdaıymyz birdeı. Biz ózara yntymaqtastyqty damytýymyz kerek,– dedi Elbasy.
Arnur Asqar,
«Egemen Qazaqstan»