Astana qalasynda Qazaqstan Respýblıkasy Ulttyq Olımpıada komıteti men Mádenıet jáne sport mınıstrliginiń birikken keńesi ótti. Oǵan sporttyń olımpııalyq túrleri boıynsha ulttyq federasııalardyń jetekshileri qatysty.
Jıynda Qazaqstanda sportty qarjylandyrýdyń jańa modeline saı, sport túrlerin saralap qarjylandyrýdyń erejesi túsindirildi.
Keńeste sóz alǵan QR UOK Bas hatshysy Danııar Abýlgazın saralap qarjylandyrý úlgisiniń engizilýi otandyq dene shynyqtyrý jáne sport salasynyń damýyna baǵyttalǵan jańa qadam ekendigine toqtaldy. «Mundaı model sporty joǵary deńgeıde damyǵan Avstralııa, Germanııa, Fransııa jáne Reseı sııaqty elderde bar. Halyqaralyq Olmpıada komıtetiniń ózi saralaý prınsıpin halyqaralyq sport federasııalaryn qarjylandyrý kezinde qoldanady. Árbir el saralap qarjylandyrýdyń krıterıı-talaptaryn ózindegi sport salasy men dene shynyqtyrý júıesin qarjylandyrý erekshelikterine qarap anyqtaıdy», – dep atap ótti Bas hatshy.
Eske salsaq, aǵymdaǵy jyldyń mamyr aıynda Qazaqstan Prezıdenti Nursultan Nazarbaev «Qazaqstan Respýblıkasynyń dene shynyqtyrý jáne sport máseleleri boıynsha keıbir zań aktilerine ózgerister men qosymshalar engizý týraly» sportty qarjylandyrý júıesin jetildirýge baǵyttalǵan jańa zańǵa qol qoıǵan bolatyn.
Egemen-aqparat