EKSPO-2017 kórmesi aıasynda Qatar memleketiniń pavılonynda bıznes is-shara ótti. Oǵan Kahramaa kompanııasynyń, Qatar University oqý ornynyń ókilderi, sondaı-aq, qazaqstandyq bıznesmender qatysty.
Is-shara barysynda tabıǵı resýrstardy saqtaý salasyndaǵy mindetter kórsetildi. Al jıynda sóz alǵan spıkerler Qatardaǵy jańartylatyn energııa kózderiniń qoldanystaǵy jáne josparlanyp otyrǵan jobalary jáne tabıǵı resýrstardy saqtaý jobalary týraly oı bólisti.
Kahramaa ókilderi eldegi energııany únemdeý jáne sý resýrstaryn saqtaý salasyndaǵy jumys nátıjelerin usyndy. Máselen, 2015 jyldan bastap Qatar sý tutynýdy 35%-ǵa, al elektrdi 20%-ǵa qysqartty.
Tabıǵı resýrstardy saqtaý týraly memlekettiń jańa zańyna sáıkes Kahramaa birqatar tehnologııalardy ázirlep jatyr. Olardyń arasynda ǵımarattardy energııamen qamtamasyz etýge arnalǵan kún energııasyn paıdalaný jobasy, sýmen jylytý salasyndaǵy ázirlemeler bar. Sonymen qatar, normatıvtik-quqyqtyq akti sý jylytqyshtar, tońazytqyshtar men muzdatqyshtar, kir jýatyn mashınalar úshin elektr energııasy ónimdiliginiń eń tómengi standartyn engizýde.
Qatar ýnıversıteti is-shara barysynda fýtbol stadıonynyń josparyn tanystyrýdy da umytpady.
Aıta keterligi, bul elde 2022 jyly fýtboldan álem chempıonatyn ótkizý josparlanyp otyr. Qurylystyń ereksheligi salqyndatýdyń ınnovasııalyq júıesinde. Onda arnaıy tehnologııa salqyn jeldi sımýlıasııalaý jáne salqyndatqysh arqasynda fýtbolshylar men kórermenderdiń qolaıly temperatýrany stadıonda ustap turýǵa múmkindik beredi. Qatarda jazdy kúni aýa raıy ystyq bolady. Sondyqtan álem birinshiligi alǵash ret qys mezgilinde ótkizilý josparlanyp otyr.
Qazirgi ýaqytta Qatar ýnıversıtetiniń ǵalymdary stadıonda salqyndatqysh júıesin ornatý boıynsha qyzmet etip jatyr. Jıyn barysynda atalǵan ýnıversıttiń professory, doktor Saýd Ghanı qurylysshylardyń qandaı jaǵdaıda jumys istep jatqanyn áńgimelep berdi. Ýnıversıtet 35-40 gradýs ystyqta qurylysshylardyń kıetin kaskasy 15 gradýsqa deıin salqyndaıtyn tehnologııany ashty.
Aıta keterlik taǵy bir jaıt, 2022 jyly ótetin álem chempıonatyna buryn-sońdy bolmaǵan qarjy jumsalý josparlanyp otyr.
Saýd Khanı sóz sońynda álem chempıonatyna Qazaqstannyń da qatysqanyn qalaıtynyn aıtty.
Kezdesý barysynda qazaqstandyq bıznesmender tabıǵı resýrstardy saqtaý salasynda áriptesterdiń usynystaryna qyzyǵýshylyq tanytty.
Qazaqstan men Qatar bir-biri úshin mańyzdy ekonomıkalyq seriktester ekenin aıta ketken jón. Máselen, ótken jyl ishinde eki eldiń arasyndaǵy taýar aınalym 746,5 myń AQSh dollaryn qurady, solardyń ishinde eksport – 647,6 myń, ımport – 98,9 myń AQSh dollary.
Aıta keteıik, Kahramaa – Qatar halqyna elektr men sý jetkizýdi qamtamasyz etý jáne retteý úshin 2000 jyly qurylǵan kompanııa. Kompanııanyń aksııalarynyń 42,74 %-y memleketke tıesili bolsa, qalǵan 57,26 %-y – jeke menshik.
Al Qatar University – Qatarda 1972 jyly ashylǵan ýnıversıtet. Munda qazir 14 000 myń stýdent bilim alyp júr. Reıtıng boıynsha №1 oqý orny bolyp esepteledi.