Jeńil atletıkadan Qazaqstan quramasynyń bas bapkeri Georgıı Egorov otandyq atletterdiń 2017 jylǵy Búkilálemdik jazǵy ýnıversıadada synǵa túsýlerine qatysty óz pikirin bildirip, Ashhabadta ótetin Azııa oıyndaryna qatysty josparlarymen bólisti. Bul týraly jeńil atletıka federasııasy habarlady.
– Grıgorıı Aleksandrovıch, stýdentter arasynda ótken oıyndardan bizdiń qurama bıiktikke sekirýden Sergeı Grıgorev enshilegen bir kúmis medalmen oraldy. Taıbeı stadıonyndaǵy sportshylardyń básekelestigi qalaı órbidi?
– Iıa, Ýnıversıada jarysynda bizge bir medal ǵana buıyrdy jáne birqatar sportshylarymyz úzdik ondyqtarǵa ilindi. Fınalǵa shyqqan sportshylarymyz az bolmady, alaıda marapat minberine kóterilý baqyty tek Sergeı Grıgorevke buıyrdy. Ol Taıbeıde jaqsy nátıje kórsetti, jeńiske jetýge de múmkindigi bar edi. О́zge sportshylarymyz týraly aıtatyn bolsaq, barlyǵy sońyna deıin bar kúshin salyp, júlde úshin talasty. Bul sport, udaıy jeńiske jete berý múmkin emes. Áıelder arasyndaǵy 100 metrge 4 qaıtara júgirý estafetasy kóńilge qaıaý túsirdi. Qyzdarymyz jaqsy nátıje kórsetti, ózderiniń myqty ekenderin dáleldedi. Alaıda, bir sportshymyzdyń kórshi jolaqty basyp ketkeni úshin búkil qurama jarystan shettetildi. Ekinshi bolyp kelgen Shveısarııa quramasy aryz jazdy, biz qarsy turýǵa barymyzdy saldyq, erejeniń aty ereje. Qalaı bolǵanda da, bul jarys biz úshin úlken tájirıbe boldy.
– Jarysta jeńiske jetken sportshylardyń nátıjelerine qarasaq, Ýnıversıadadaǵy básekelestik joǵary bolǵan sekildi...
– Taıbeıge Londondaǵy álem chempıonatyna qatysqan sportshylar bardy, jarystyń keı túrlerinde óte jaqsy nátıjeler kórsetildi. Mysaly, naıza laqtyrý boıynsha altyn medal alǵan Chao-Sýn Chenniń kórsetkishi álemdik birinshiliktiń jeńimpazy, nemis Iohaness Fetterdiń nátıjesinen de asyp ketti. Ýnıversıadadaǵy jeńil atletıka boıynsha ótken týrnır quramy boıynsha eń myqty boldy, jarys joǵary deńgeıde ótti.
– Bizdiń atletterdiń kórsetkishterine ystyq aýa-raıy áser etýi múmkin be?
– Olaı deýge bola qoımas. Barlyǵyna ortaq jaǵdaı jasaldy ǵoı, oǵan qosa keıde jarys kezinde jańbyr jaýyp, keıbir starttar shegerilip te jatty. Biraq, Ýnıversıadaǵa daıyndyq kezinde Qazaqstanda aptap ystyq boldy, álem chempıonatynda óner kórsetpegen quramanyń jartysy tolyqqandy jattyǵý jumystaryn ótkize almady. Mysaly, ıadro laqtyrýshy Ivan Ivanov keıbir jattyǵýlar kezinde 40 gradýs ystyq bolǵanyn, sonyń saldarynan durys babyna kele almaǵanyn aıtty. О́kinishke oraı, sportshylarymyz úshin ortaq daıyndyq ótkizýge múmkindik bolmady. Bul da kórsetkishterge óz áserin tıgizdi.
– Taıbeıden orala sala bizdiń qurama kelesi iri jarysqa daıyndyq jumystaryn bastap ketti. 17 qyrkúıekte ashylatyn Ashhabadtaǵy Azııa oıyndarynan ne kútesizder?
– Túrkimenstan astanasynda Qazaqstan 15 atletpen synǵa túspek, olardyń sapynda barlyq myqty sportshylarymyz bar. Ýnıversıadadan keıin atletterimiz jaqsy óner kórsetýge talpynyp júr dep bilemin. Azııada ózderiniń úzdik ekendikterin dáleldeıdi dep senemin. Qazir qarqyndy túrde jattyǵý jumystary júrip jatyr. Aldyn-ala boljam jasaǵym kelmeıdi, alaıda, sońyna deıin kúresemiz. V. Zıabkına, O. Safronovamen birge M. Ishangýlıeva, E. Mıhına qatysatyn 400 metrge 4 qaıtara júgirý boıynsha áıelder estafetasy qyzyq bolady dep oılaımyn. Ishangýlıeva 800 metr qashyqtyqta da óz baǵyn synaıdy.
– Bizdiń aldyńǵy qatarly jeńil atletimiz Olga Rypakova jaqynda ǵana «Gaýhar lıgada» úzdik óner kórsetip, endi Ashhabadta úsh qarǵyp jáne uzyndyqqa sekirýden baq synamaqshy, solaı ma?
– Azııa oıyndarynyń uıymdastyrýshylaryna ótinish joldaı otyryp biz ony eki dıssıplına boıynsha qatysady dep jazdy. Alaıda, bári sol jerde belgili bolady. Onyń ózin qalaı sezinýine baılanysty, sońǵy sóz Olganyń ózinde.
– Qurama Ashhabadqa qashan attanady?
– Qyrkúıektiń 15 kúni, al jarys úsh kún boıy ótedi – 18-20 aralyǵynda. Ashhabadtaǵy Azııa oıyndary úshin arnaıy jabyq arena salyndy. Ol bizge sáttilik ákeledi dep oılaımyn.