Búgin Qazaqstan dızaınerlerin qoldaý maqsatynda BUU Damý Baǵdarlamasy EXPO-2017 aýmaǵynda sán kórsetilimin uıymdastyrdy. Is-shara jasyl ekonomıkaǵa nazar aýdartý, sondaı-aq Qazaqstan ekonomıkasynyń shıkizattyq emes sektorynda jumys oryndaryn ashý maqsatymen ótkizildi.
«Aspara» sán úıiniń bas dızaıneri Aıdarhan Qalıev sońǵy jınaǵyn kórsetti. Sonymen qatar, kórsetilimge Aqtaý qalasynyń qazaq ulttyq kıimderin tigetin «Tarbı» salony qatysty. Atalmysh sán úıi «Adaıqyz» jáne «Aqbóbek» atty sońǵy ınterer jınaqtaryn Ońtústik Koreıa, Reseı, Bolgarııa, Makedonııa, Túrkııa jáne Túrkmenstan memleketterinde kórsetti. Qoıylymdy Qyzylorda oblysynyń ókilderi Qojantaeva Saltanat pen О́tepova Kýlıaınanyń úlgileri támamdady.
«Sońǵy úsh jylda biz qolónerdi belsendi qoldap kele jatyrmyz. Qolóner salasy shıkizat naryǵynan táýelsiz ekologııalyq taza materıaldardy paıdalanatyn «jasyl» jumys oryndarynyń paıda bolýyna kómektesedi. Buǵan qosa, qolónershiler ózderine jáne olardyń otbasylaryna laıyqty tabys ákeletin jumysqa ıe bolady», - dedi BUUDB Qazaqstandaǵy turaqty ókiliniń orynbasary Mýnhtýıa Altangerel.
«Biz júzden astam sheberlerdi qoldadyq, olardyń otyzdan astamy basqa mamandardy daıyndaıdy jáne jasyl ekonomıkany damytýǵa úles qosyp júr», - dep qosty Mýnhtýıa hanym.
Qazaqstandaǵy BUUDB 2014 jyldan bastap aýyldyq jerlerde jumys oryndaryn qurý jáne qazaq halqynyń mádenı murasyn saqtaý maqsatynda Qazaqstannyń ár túrli oblystaryndaǵy óńirlik baǵdarlamalar sheńberinde qolónershilerdi qoldap keledi.