Búgin «Kazakh Invest» kompanııasy men túrik ınvestorlary jalpy somasy 590 mln AQSh dollaryn quraıtyn 9 ınvestısııalyq qujatqa qol qoıdy, dep habarlaıdy Baq.kz
Kelisimder men memorandýmdar «Calik Holding», «Agrobest Group», «Yildirim Holding», «Yildizlar SSS Holding» jáne basqa da túrik holdıngteri arasynda jasaldy. Bul kompanııalar Qazaqstan aýmaǵynda qysh taqtaısha zaýytyn, gaz-elektr stansııasyn, kalsıı qosylǵan soda zaýytyn, gebısıd óndirisi, oıyn-saýyq ortalyqtary sekildi birqatar jobany júzege asyrmaq.
«Búgin biz QR Premer-mınıstrimen birge úlken túrik kompanııalarymen kelissózder júrgizdik. Olardyń keıbiri burynnan osynda jumys isteıdi, keıbiri Qazaqstandaǵy energetıka, aýyl sharýashylyǵy salalaryn syrttan baqylap, qyzyǵýshylyq tanytyp otyr. Búgingi memorandým boıynsha «Calik Holding» energetıkalyq nysandar salmaqshy. «Agrobest Group» bolsa jyl sońyna deıin Almaty oblysynda gerbısıd óndiretin jobany iske qospaq. «Yildirim Holding» Jambyl oblysynda kalsıı qosylǵan soda óndirisin júzege asyrýdy josparlap otyr. Túrik ınvestorlarynyń mundaı bastamalary Qazaqstan ekonomıkasyna oń úlesin qosady dep oılaımyz. «Kazakh Invest» kompanııasynyń mindeti – ınvestorlarǵa kómek berý, Qazaqstanda bıznesin júrgizýge múmkindik berý. Mundaı jobalar elimizdiń gúldenýine áser etedi», - dedi «Kazakh Invest» UK» AQ basqarma basshysy Maqsat Qabashev.
Sonymen birge ol barlyq jobalar Qazaqstan naryǵyn qamtyp, eksportqa da shyǵatynyn atap ótti. О́z sózinde gerbısıd óndiretin zaýyt qurylysy qarasha aıynda bastalyp, 12 aıdan soń iske qosylady dep málimdedi.
Investısııalyq qujattarǵa qol qoıylǵan soń mundaı jobalar birden iske qosylmaıdy. «Kazakh Invest» UK» AQ ınvestısııa tartý departamentiniń dırektory Jandos Orazalınniń aıtýynsha, tolyqtaı jobalardyń iske qosylýy 5 jylǵa deıin ýaqyt alady.
«Mundaı kelisimge kelý úshin biraz jumystar atqaryldy. Túrkııaǵa da bardyq, ózimizde de kezdesýler ótti. «EKSPO-2017» kórmesine kelgen túrik kompanııalarymen kelissózder júrdi. Búgin jalpy somasy 590 mln AQSh dollaryn quraıtyn 9 qujatqa qol qoıyldy. Ár jobanyń óziniń oryndalý merzimi bolady. Túrik ınvestorlary birinshi elge kelip, ujymdaryn qurý, qurylys jumystaryn júrgizý jumystary 3 jyldan 5 jylǵa deıin ýaqytty alady. Keıbir jobalar 1-2 jylda júzege asady dep oılaımyn», - dedi Jandos Orazalın.
Túrik ınvestorlary jobany júzege asyrýdyń alǵashqy kezeńinde sheteldik jumys kúshin Qazaqstanǵa ákeledi. Olar óndiris nysandarynyń qurylysyn salý, quraldarmen jabdyqtaý sekildi jumystardy atqarady. Sodan soń qazaqstandyq jumys kúshi paıdalanylady. Investısııalyq jobalar Qazaqstannyń barlyq oblysyn qamtıdy.
QR Prezıdenti 2016 jyldyń sáýirinde Ystanbulǵa barǵan saparynan keıin Túrkııadaǵy shaǵyn jáne orta bıznes ókilderi tarapynan, sondaı-aq transulttyq kompanııalar tarapynan da Qazaqstanǵa degen qyzyǵýshylyqtyń jyldam óskenin atap ótken jón. Túrik ınvestorlary daıyn ónimdi EAEO jáne Ortalyq Azııa elderine eksporttaý men óz ónerkásipterin ornalastyrý alańy retinde qarastyrady. Sońǵy úsh jylda Túrkııadan kelgen ınvestorlar Qazaqstanda qaıta ınvestısııalaýdy jáne óndiristik qýattaryn arttyrýdy belsendi túrde júrgizip otyr.
Sońǵy bes jylda túrik ınvestorlarymen 667,5 mln. AQSh dollary somasyna 18 joba iske asqan. Aldaǵy ýaqytta jańa 10 jobany júzege asyrý josparlanyp otyr.
Búgingi kúni Qazaqstan men Túrkııa arasyndaǵy ınvestısııalyq bastamalardyń jalpy paketi 2,7 mlrd AQSh dollaryn quraıtyn 70 joba iske enip, sonyń ishinde 31 joba iske qosyldy. Al 40 joba aldaǵy ýaqytta júzege asyrylýy múmkin. 2017 jyldyń jartyjyldyq qorytyndysy boıynsha syrtqy saýda aınalymy 925,1 mln teńgeni qurady.