Qazaqstan Prezıdenti Nursultan Nazarbaev Túrkııa Respýblıkasynyń Prezıdenti Rejep Taııp Erdoǵanmen kezdesti, dep habarlady Prezıdenttiń baspasóz qyzmeti.
Nursultan Nazarbaev Rejep Taııp Erdoǵanǵa Qazaqstanǵa resmı saparmen kelgeni úshin shynaıy rızashylyǵyn bildirdi.
– Qansha kezdessek te kóptik etpeıdi. Qazirgi zamannyń ózi qıyndap tur. Jıi kezdesip, kóp aqyldasý kerek. 25-26 jyl ishinde Qazaqstan men Túrkııa arasyndaǵy qarym-qatynas dostyq ári baýyrlastyq baǵytta damyp keledi, – dedi Nursultan Nazarbaev.
Memleket basshysy Túrkııa Prezıdentiniń Qazaqstanǵa jasaǵan budan burynǵy sapary kezinde ekonomıka salasyna qatysty birqatar ýaǵdalastyqqa qol jetkizilgenin atap ótti.
– Qabyldanǵan kelisimder aıasynda kóp jumys atqarylýda, kóptegen jobalar iske asyryldy. О́ńirlik sıpattaǵy problemalar bizde de, Túrkııada da bar. Búgingi kezdesýimiz sol máselelerdi talqylaýǵa múmkindik beredi, – dedi Qazaqstan Prezıdenti.
Sondaı-aq Nursultan Nazarbaev Túrkııa Prezıdentine bıylǵy 10 qyrkúıekte Astanada ótetin Islam yntymaqtastyǵy uıymynyń ǵylym jáne tehnologııalar jónindegi sammıtine qatysýǵa nıet bildirgeni úshin alǵys aıtty.
Budan bólek, Memleket basshysy bıylǵy 14 qyrkúıekte elordamyzda Sırııadaǵy qarýly qaqtyǵysty retteý jónindegi Astana kelissózderiniń altynshy raýndy ótetinine nazar aýdardy.
Túrkııa Respýblıkasynyń Prezıdenti Qazaqstanǵa saparmen kelýge shaqyrǵany úshin Nursultan Nazarbaevqa rızashylyǵyn bildirdi.
– Astanaǵa kelgenime qýanyshtymyn. Men alǵash ret Qazaqstandy Almaty qalasyna barǵan saparymda tanyp-bildim. Endi jańa qalaǵa, jańa elordaǵa kelip otyrmyn, Qazaqstandy óz úıimdeı kóremin, – dedi R.Erdoǵan.
Túrkııa Prezıdenti óz eliniń Qazaqstanmen saıası, ekonomıkalyq, mádenı, áskerı qatynastardy damytýǵa kúsh salyp jatqanyn atap ótti. – Búginde elderimiz arasyndaǵy taýar aınalymy 2 mıllıard dollar shamasynda. Árıne, bul jetkiliksiz. Biz keliskendeı, maqsatymyz – taýar aınalymyn 5 mıllıard dollarǵa jetkizý. Túrkııa men Qazaqstannyń áleýeti oǵan jetkilikti, – dedi Túrkııa Respýblıkasynyń basshysy.
Sondaı-aq R.Erdoǵan Nursultan Nazarbaevqa óńirlik problemalardy sheshýge baǵyttalǵan bitimgershilik qyzmeti úshin erekshe alǵysyn bildirdi. Túrkııa Prezıdenti bıylǵy 14 qyrkúıekte Astanada ótetin Sırııadaǵy jaǵdaıǵa qatysty kezdesýdiń mańyzdylyǵyna toqtalyp, onyń Jeneva kelissózderine oń yqpal etetinine senim bildirdi.
Ekeýara kezdesýden keıin Elbasy Nursultan Nazarbaev Túrkııa Respýblıkasynyń Prezıdenti Rejep Taııp Erdoǵannyń resmı saparynyń qorytyndysy boıynsha BAQ ókilderi úshin brıfıng ótkizdi.
Memleket basshysy Qazaqstan men Túrkııanyń saıası jáne ekonomıkalyq turǵydan bir-birine jaqyn ekenin aıtyp, eki el arasyndaǵy yntymaqtastyq qarqyndy damyp otyrǵanyn atap ótti.
– Túrkııa – Qazaqstannyń eń jaqyn saıası jáne ekonomıkalyq seriktesiniń biri. Ekijaqty tyǵyz yntymaqtastyq árdaıym belsendi damyp keledi. Joǵary deńgeıdegi kezdesýler jıi ótkizilýde. Bıyl dıplomatııalyq qarym-qatynasymyzdyń ornaǵanyna 25 jyl tolyp otyr, – dedi Qazaqstan Prezıdenti.
Nursultan Nazarbaev túrik kapıtalynyń qatysýymen 1600-den astam kásiporyn jumys istep jatqanyn, sondaı-aq birlesken ınvestısııalyq jobalardy odan ári damytý qajet ekenin aıtty.
Memleket basshysy Qazaqstannyń kólik-tranzıt áleýetin arttyrýda Túrkııanyń tájirıbesin qoldanýǵa nıetti ekenimizdi jetkizdi.
– Túrkııa ınfraqurylymy damyǵan tranzıttik el ekeni barshaǵa belgili. Osyny eskerip, túrik tarapyn Qazaqstannyń kólik-tranzıt áleýetin birge damytýǵa shaqyrdym, – dedi Nursultan Nazarbaev.
Qazaqstan Prezıdenti eki el arasyndaǵy mádenı-gýmanıtarlyq qarym-qatynastardy damytý máselelerine toqtalyp, joǵary oqý oryndary arasynda ózara stýdentter almasýdyń mańyzdylyǵyn atap ótti.
Sondaı-aq, Nursultan Nazarbaev R.Erdoǵanmen áńgimelesý barysynda halyqaralyq kún tártibindegi ózekti máselelerdi talqylaǵanyn aıtty. – Negizgi jahandyq máseleler jónindegi ustanymymyz uqsas. Eki el arasynda túsinispeýshilikter joq. Astana Sırııa máselesi boıynsha kelissóz júrgizý úshin óz alańyn usyndy. Osylaısha, biz bul problemany tek beıbit jolmen sheshýge óz úlesimizdi qosyp otyrmyz, – dedi Memleket basshysy. Sóz sońynda Qazaqstan Prezıdenti Túrkııa tarapyna EKSPO-2017 halyqaralyq kórmesin daıyndaýǵa jáne ótkizýge belsendi túrde atsalysqany úshin alǵys bildirdi.
R.Erdoǵan eki el arasyndaǵy baılanystardy damytý jónindegi dıalogtyń jalǵasýyna nıetti ekenin aıtyp, Qazaqstan Prezıdentin kelesi jyly Túrkııa Respýblıkasyna saparmen kelýge shaqyrdy.
Túrkııa Prezıdenti Qazaqstanda jumys isteıtin túrik ınvestorlary men bıznesmenderine qoldaý kórsetip, olarǵa qolaıly jaǵdaı týǵyzǵany úshin Nursultan Nazarbaevqa alǵys aıtty.
– Bizdiń yntymaqtastyǵymyz aldaǵy ýaqytta da nyǵaıa túsetinine senimdimin. Men Qazaqstandy iri halyqaralyq is-sharalardy tabysty uıymdastyrýymen taǵy da quttyqtaǵym keledi. Sizderdiń respýblıkalaryńyz – Ortalyq Azııa óńirindegi kóshbasshy memleketterdiń biri. Biz sizderdiń jetistikterińizge shynaıy qýanamyz, – dedi R.Erdoǵan.
Sońynda Túrkııa Prezıdenti «Nurly jol» baǵdarlamasyn iske asyrýǵa jan-jaqty qoldaý kórsetýge nıetti ekenin aıtyp, Qazaqstan jaǵyna qonaqjaılylyq kórsetkeni úshin rızashylyq bildirdi.
* * * Túrkııa Respýblıkasy Prezıdentiniń Qazaqstanǵa resmı saparynyń qorytyndysy boıynsha tómendegideı qujattarǵa qol qoıyldy:
– Úkimetaralyq ekonomıkalyq komıssııanyń 10-shy otyrysynyń hattamasy;
– 2017-2020 jyldarǵa arnalǵan «Jańa sınergııa» birlesken ekonomıkalyq baǵdarlamasynyń is-sharalar josparynyń hattamasy;
– Qazaqstan Respýblıkasy Investısııalar jáne damý mınıstrligi men «Alsım Alarko» konsorsıýmy jáne Eýropa qaıta qurý jáne damý banki arasynda «BAKAD» avtokólik jolyn salý jáne ony paıdalaný máselesi boıynsha ózara túsinistik týraly memorandým.
Sýretter Prezıdenttiń baspasóz qyzmetinen alyndy