Oblysta kadr tapshylyǵyn sheshý úshin árbir aýdan, qaladaǵy eldi mekennen qyzmettik turǵyn salý qajet. Bul týraly búgin Ońtústik Qazaqstan oblysynyń ákimi J.Túımebaev selektorlyq jıynda aıtyp, tıisti sala basshylaryna tez arada qolǵa alýdy tapsyrdy.
Aýdan, qala ákimderi men basqarma basshylarynyń qatysýymen ótken májiliste shalǵaı eldi mekenderde ómir súrip, memlekettik jáne bıýdjettik salada oryn alatyn kadr jetispeýshiligi máselesi men onyń sheshý joldary qaraldy.
Sapaly kadr daıyndaý zaman talaby ekenin aıtqan aımaq basshysy árbir qyzmetkerge barynsha jaǵdaı jasaý qajettigin jetkizdi.
«Bilikti kadrdy jumysqa alý úshin oǵan, eń aldymen, úı máselesin sheship berýimiz kerek. Sondyqtan, Ońtústiktegi árbir aýyldyq okrýgten 20 páterli eki qabatty, al aýdan ortalyǵynan 30-40 páterli kópqabatty tıptik úlgidegi turǵyn úı salýdy bıylǵy jyldan qalmaı qolǵa alýdy qurylys basqarmasyna tapsyramyn. Osy arqyly biz maman tapshylyǵyn joıyp, sapaly kadrǵa qol jetkizemiz dep oılaımyn. Munan bólek, jumystyń sapasyn arttyryp, bilikti kadrlar daıyndaý úshin rotasııalaý tetigi arqyly oblys boıynsha mamandardy ózge aýdandarǵa jumysqa jiberý tıimdi ádis bolyp tabylady»,-dedi ákim.
Sonymen qatar, óńir basshysy turǵyn úı salý arqyly aýdan ákimderiniń ındıkatorlyq kórsetkishin baǵalaıtynynda atap ótti.
Jıynda sóz alǵan oblystyq bilim basqarmasynyń basshysy Isataı Saǵyndyqov óńirdegi 15 aýdan, qala ákimdikterinen jáne salalyq basqarmalardan 87 mamandyq boıynsha 14374 orynǵa suranys kelip túskenin málim etti.
«Jas mamandardyń kóptep aýyldarǵa oralýy, memleket tarapynan iske asyrylyp jatqan «Jastar praktıkasy» men «Dıplommen aýylǵa» baǵdarlamalarynyń nátıjesinde aýyldyq jerlerde kadr jetispeýshiligi oń sheshimin tabýda desek te bolady. Alaıda shalǵaı jerlerde ornalasqan mektepterdegi maman tapshylyǵy áli de ótkir máselelerdiń qatarynda. Máselen, oqý júktemesiniń az bolýy, turǵyn úı máselesiniń sheshilmeýine baılanysty pedagogtar aýyldarǵa barǵylary kelmeıdi»,-dedi basqarma basshysy.
Al densaýlyq saqtaý salasyndaǵy maman tapshylyǵy men turǵyn úımen qamtý máselesi aıqyn. Máselen, basqarma basshysy Muqan Egizbaevtyń málimetinshe, 2007-2016 jyldar aralyǵynda densaýlyq saqtaý basqarmasy 1085 jas mamandy aýyldyq jerlerge jumysqa ornalastyrsa, aýyl ákimshiligi tarapynan 293 jas maman turǵyn úımen qamtylǵan. Al dál qazirgi tańda densaýlyq saqtaý basqarmasyna qarasty medısınalyq uıymdarda jalpy 265 maman, onyń ishinde 157 maman aýyldy jerge qajet. Sondaı-aq, oblystyń bas dárigeri aýyldy jerlerde jumys atqaryp otyrǵan 180 maman turǵyn úıge muqtaj ekenin aıtyp, dese de memleketten jas mamandarǵa birshama qoldaý kómek berilip jatqanyn málimdedi.
«Jas mamandarǵa oblystyq bıýdjetten 100 myń teńge mólsherinde aqshalaı ótemaqylar men tólemder tólenip kelgen. Endi, Sizdiń bastamańyzben aýyldyq jerge joldanatyn ár mamanǵa bir rettik 1 mıllıon teńge tólenedi jáne 5 jyl ishinde qaıtyp ketken jaǵdaıda jas maman bıýdjetke qaıtarý kerek bolady. Mundaı tyń joba elimiz boıynsha Ońtústik Qazaqstanda alǵash bolyp júzege asyrylyp otyr»,-dedi M.Egizbaev.
Osy rette, oblys ákiminiń eldi mekenderde kóp qabatty turǵyn úı salý ıdeıasy joǵaryda aıtylǵan máselelerdiń ret-retimen sheshilýine muryndyq bolary sózsiz.
Selektorlyq jıynnyń kún tártibinde qaralǵan kezekti taqyryp - jergilikti atqarýshy organdar qyzmetiniń tıimdiligin baǵalaý nátıjeleri boldy. Onda ákim barsha memlekettik qyzmetkerler men aýdan,qala ákimderine jáne basqarma basshylaryna ádep normalaryn saqtaýdy basshylyqtan bastaýdy tapsyrdy.