Almaty qalasyndaǵy «Dostyq úıi» ǵımaratynda «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» ázirlengen zań jobasyn talqylaý boıynsha qoǵamdyq pikir kóshbasshylary men ǵylymı-sarapshylar qaýymdastyǵy ókilderiniń dóńgelek ústeli ótti.
Din isteri jáne azamattyq qoǵam vıse-mınıstri Berik Aryn, Din isteri komıteti tóraǵasynyń mindetin atqarýshy Erkin Ońǵarbaev, Azamattyq qoǵam isteri komıtetiniń tóraǵasy Álııa Galımova, sondaı-aq belgili ǵalymdar, dintanýshylar, teologtar, zańgerler, blogerler men úkimettik emes uıymdardyń ókil- deri, sarapshylar qatysqan atalmysh jıyn barysynda zań jobasyna engizilip otyrǵan ózgerister men tolyqtyrýlar jan-jaqty talqylandy.
«Biz zań jobasynyń jumysyna memlekettik organdarmen qatar, qoǵamnyń da belsendi aralasýyna múddelimiz. Biz úshin azamattyq qoǵamnyń barlyq ókilderimen ashyq suhbat júrgizý mańyzdy», dep atap ótti vıse-mınıstr Berik Aryn óz sózinde.
Zań jobasyn talqylaýǵa qatysty mańyzdy basqosýǵa qatysýshylar din salasyndaǵy zańnamany jetildirýdiń jáne atalǵan qujatty qabyldaýdyń qajettiligine jalpy qoldaý kórsete otyryp, óz eskertýleri men usynystaryn jetkizdi.
Din isteri komıteti tóraǵasynyń mindetin atqarýshy Erkin Ońǵarbaev zań jobasyn daıyndaý barysynda memlekettik organdardyń, qoǵamdyq birlestikterdiń, sarapshylar qaýymdastyǵy men azamattardyń usynystary men pikirleri barynsha eskeriletinin, qoldanystaǵy zańnamalarǵa jańa normalardy engizýde halyqaralyq tájirıbege basa nazar aýdarylatynyn atap ótti.
Mıra BAIBEK, «Egemen Qazaqstan»
ALMATY