Velosporttan Ispanııa tasjoldarynda ótken «Výelta-2017» kópkúndigi aıaqtaldy.
Bıyl 72-shi ret uıymdastyrylǵan týrnır qazaqstandyq «Astana» velokomandasy úshin óte sátti ótti. Alekseı Lýsenko 23 tamyzda «Výeltanyń» 5-shi kezeńin jeńip alsa, «Astananyń» kolýmbııalyq shabondozy Mıgel Anhel Lopes 11-shi jáne 15-shi taýly kezeńderinde top jardy.
Velokópkúndiktiń qorytyndysy boıynsha, brıtanııalyq Krıs Frým («Sky») jekeleı básekede jeńimpaz atandy. «Astana» komandasy sapynan eń úzdik nátıjeni Mıgel Anhel Lopes kórsetti. «Výeltanyń» eki kezeńin jeńip alǵan Lopes jalpy kórsetkishte 9-orynǵa turaqtady. Al «Astananyń» basqa ókilderiniń orny mynadaı: Fabıo Arý – 13-oryn, Pelo Bılbao – 23, Lýıs Leon Sanches – 31, Alekseı Lýsenko – 73, Sergeı Cherneskıı – 94, Laýrens De Vrez – 122 jáne Nıkıta Stalnov – 145.
Al komandalyq jarysta «Astana» velokomandasy úzdik atandy. 3300 shaqyrymǵa sozylǵan tasjoldy elorda komandasy 247 saǵat 16 mınýt 21 sekýndta júrip ótti. «Astanadan» alty mınýt 16 sekýnd qalyp qoıǵan ıspanııalyq «Movistar» ekinshi oryn ıelendi. Úzdik úshtikti «Team Sky» qorytyndylady. Brıtanııalyq komandanyń veloshabandozdary márege bizdiń klýbtan 8 mınýt 12 sekýnd keıin kelgen.
Álı BITО́RE, «Egemen Qazaqstan»