Taıaýda Qaraǵandynyń «Shalqyma» konsert zalynda jyr men terme oryndaýshylary arasynda Qazybek bıdiń 350 jyldyǵyna arnalǵan «Ordaly sózdiń ıesi – Qazybek» atty saıys ótti. Qazaqstan Respýblıkasy Mádenıet jáne sport mınıstrliginiń uıymdastyrýymen ótken dúbirli doda eki kezeńmen úsh kúnge jalǵasty. Birinshi kezeńde qatysýshylar túrli terme mektepteri ókilderiniń shyǵarmalaryn oryndady. Ekinshi kezeńde ónerpazdar qazaqtyń epostyq dastandaryn jyrlady. Saıysqa Qazaqstannyń ár óńirinen barlyǵy
16 termeshi men jyrshy qatysty.
Saıys qorytyndysy boıynsha bes qatysýshy Alǵys hatpen marapattalsa, qaraǵandylyq Muhtar Ádilov pen Nurmuhamed Baısúgirov «Terme» atalymyndaǵy «Úkili úmit» arnaıy júldesin ıelendi. «Jyr» atalymynda almatylyq Danııar Raqymbaı dıplomant atansa, terme boıynsha dıplomant – Manash Ádilbaev.
«Jyr» atalymynda III oryndy Qyzylordadan kelgen Sholpan Beıimbetova aldy, II oryn aqtóbelik Perýza Qalýovaǵa buıyrdy, al I oryndy Batys Qazaqstan oblysynan kelgen Farhat Orazov ıelendi. «Terme» atalymynda III oryndy Astanadan kelgen Aınur Qonysbaeva ıelendi.Osy atalym boıynsha II oryndy almatylyq Juldyz Ysqaqova alsa, I oryn astanalyq Baqdáýlet Tolybekulynyń enshisine buıyrdy.
Al qyzylordalyq Maıra Sársenbaeva úzdik ónerimen erekshelenip, Qazybek bı atyndaǵy Bas júldege ıe boldy.
– Bul saıys ulttyq ónerdi qaıta jańǵyrtyp, damytýǵa arnalǵan. Halqymyzdyń mádenıetin saqtaýǵa jáne ony urpaqtan urpaqqa jetkizý arqyly dás- túrli ónerimizdiń tól týyndylaryn nasıhattaımyz. Baıaǵy Buqar, Úmbeteı, Qaztýǵan, Dospambet, Aqtanberdi, Shalkıiz jyraýlardyń ór rýhty jyrlaryndaǵy adamgershilik, otansúıgishtik, erlik, uıat bizdiń qanymyzda áli bar. Sondyqtan qatysýshylar Qazybek bıdiń jyrlarynan bastap oǵan deıingi aqyndardyń shyǵarmalaryn oryndaǵan ýaqytta bizdiń ǵasyrlardan ǵasyrlarǵa jalǵasyp kele jatqan Máńgilik Elge degen murat oıanady, deıdi qazylar alqasynyń tóraǵasy, aıtysker aqyn Amanjol Áltaev.
Mıras ASAN, «Egemen Qazaqstan»
QARAǴANDY
Sýrette: Ǵ.Qurmanǵalıev atyndaǵy BQO fılarmonııasynyń dástúrli ánshisi Farhat Orazov.