Búgin Ońtústik Qazaqstanda jergilikti polısııa qyzmetkerlerine 143 qyzmettik avtokóliktiń kilti tapsyryldy.
Elbasynyń Bes ınstıtýsıonaldyq reformany júzege asyrý jónindegi «100 naqty qadam» Ult josparyn iske asyrý aıasynda uıymdastyrylǵan sharaǵa oblys ákimi Janseıit Túımebaev qatysyp, birqatar sala qyzmetkerlerine avtokólikterdiń kiltin tabystady.
«Elbasynyń bastamasymen qurylǵan Jergilikti polısııa qyzmetine halyqtyń artar senimi mol. Sondyqtan, Sizder qoǵamdyq tártip pen azamattardyń qaýipsizdigin qamtamasyz etý jolyndaǵy mindetterdi tabysty júzege asyrý kereksizder. Jergilikti atqarýshy bılik pen polısııaǵa ortaq mindetter qoıylyp, kóptegen jobalar birlesip iske asyrylýda. Jergilikti bılikpen kórsetilgen qoldaý, jergilikti polısııa qyzmeti tarapynan quqyq buzýshylyqty azaıtyp, qoǵamdyq jáne jol tártibi men qaýipsizdigin saqtaýǵa oń septigin tıgizetin bolady dep senemin», - dedi óńir basshysy.
Tártip saqshylary jańa avtokólikterdi azamattardyń qoǵamdyq qaýipsizdigin saqtaý maqsatynda, qylmystardy ashý, quqyqbuzýshylardy ustaý jáne oblys ortalyǵy men aýdandarda kóshelerdi patrýldeý men qoǵamdyq qaýipsizdikti saqtaý maqsatynda paıdalanatyn bolady. Atalǵan «JAS S5» jáne LADA 21214-Nıva» markaly temirtulparlar Ult josparynyń 30-qadamyna sáıkes, oblys ákimdigi tarapynan jergilikti polısııanyń materıaldyq-tehnıkalyq jaǵdaıyn nyǵaıtýǵa qaralǵan 2,5 mlrd. teńge qarjy aıasynda alynyp otyr.
Jıynda, munan bólek, oblystyq máslıhat hatshysy Qaırat Balabıev pen Ishki ister organdary ardagerler keńesiniń tóraǵasy Serjan Tursynbekov quttyqtaý sóz sóılep, aldaǵy ýaqytta sala qyzmetkerleriniń jumys sapasy odan ári artatynyna senim bildirdi. Sondaı-aq, oblys ákimimen birge qyzmettik avtokólikterdi aralap kórdi. Odan soń, saltanatty sharaǵa qatysýshylar men qonaqtar jeke quramnyń saltanatty sherýin tamashalady.
Aıta ketý kerek, saladaǵy atqarylǵan jumystar nátıjesinde búgingi tańda, oblysta jalpy quqyqbuzýshylyq 16 paıyzǵa tússe, asa aýyr qylmystar 4 paıyzǵa, aýyr qylmystar 15,6 paıyzǵa kemidi. Sonymen qatar, qoǵamdyq oryndar men kóshelerde jasalatyn qylmystar 23 paıyzǵa tómendep otyr.