Astanadaǵy Ortalyq kommýnıkasııalar qyzmetinde «Mereıli otbasy» ulttyq baıqaýy boıynsha brıfıng ótip, oǵan Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń músheleri qatysty.
2013 jyly elimizde Otbasy kúni bekitilgeni belgili. Búginde qyrkúıektiń ekinshi jeksenbisinde Otbasy kúnin atap ótý qazaqstandyqtardyń dástúrine aınalyp keledi. Odan bólek, qoǵamda úlgili otbasylardy dáripteý arqyly otbasy ınstıtýtyn nyǵaıtýǵa úles qosý maqsatynda «Mereıli otbasy» ulttyq baıqaýynyń da ótkizilip júrgenine tórt jyldyń bederi boldy. Eń alǵash bul baıqaý 2014 jyly ótkizilgen edi. Respýblıka kóleminde uıymdastyrylyp júrgen sharanyń óz kezeńderi bar. Áne-mine degenshe jeńimpaz otbasylar anyqtalatyn sát te jaqyndap keledi. Soǵan oraı Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń brıfıngi ótip, qatysýshylar baıqaýǵa qatysty birqatar málimettermen bólisti.
Brıfıngte sóz alǵan Ulttyq komıssııa tóraıymynyń orynbasary, Ortalyq saılaý komıssııasynyń múshesi Lázzat Súleımen elimizdiń damýy men turaqtylyǵynyń kepili retinde dástúrli qundylyqtardan nár alǵan otbasynyń máni joǵary ekenin aıtty. Rýhanı daǵdarystan, jat aqparattar men jat aǵymdardyń jeteginde ketýden saqtaıtyn birden-bir jol da otbasynyń tárbıesi ekenin jetkizdi. «Otbasyndaǵy tárbıe otansúıgishtikti qalyptastyrady. Sondyqtan qoǵamdaǵy otbasynyń róli óte joǵary. Biz úlgili, mereıli otbasylardy dáripteý arqyly qoǵamdyq sanaǵa da áser etemiz. Bul turǵydan kelgende ulttyq baıqaýǵa qatysýshylardyń sany jyl sanap artyp kele jatqany qýantady. 2014 jyly baıqaýǵa 1298 otbasy qatysqan bolsa, bıyl qatysýshylardyń sany 2879-ǵa jetti. Qatysý jaǵynan Aqtóbe, Qyzylorda, Ońtústik Qazaqstan oblystary kósh bastap tur», dedi Ulttyq komıssııa tóraıymynyń orynbasary.
Áıelder isteri jáne otbasylyq-demografııalyq saıasat jónindegi ulttyq komıssııa tóraıymynyń taǵy bir orynbasary Elena Tarasenko baıqaýǵa qatysyp jatqan otbasylardyń bári de qurmet pen marapatqa laıyq ekenin aıta kelip, qatysýshylardyń quramy týraly naqty derekter keltirdi. Onyń aıtýynsha, barlyq qatysýshylardyń 36,2 paıyzy kóp balaly otbasylar bolsa, bir ǵana salada eńbek ótilderi uzaq jyldarmen esepteletin áýletterdiń sany 6,8 paıyzǵa ósken. Mysaly, 2016 jyly baıqaýǵa sondaı 483 áýlet qatysypty, bıyl olardyń sany – 500. Irikteý týrlaryna qatysqan jas otbasylar sany da artyp otyr. Byltyr 472 bolsa, bıyl 500 jas otbasy baıqaýǵa qatysqan.
Brıfıngte sóz alǵan Ulttyq komıssııanyń múshesi, Parlament Májilisiniń depýtaty Baqytbek Smaǵul tirkelmegen nekelerdiń qoǵam úshin qaýipti ekenin atap ótip, nekesiz týylǵan sábılerdiń kóbeıip kele jatqanyna alańdaýshylyq bildirdi. Bul jaılardyń rýhanı daǵdarystyń áserinen oryn alyp jatqanyn, sol úshin qoǵamda mereıli otbasylardy kóbirek nasıhattaý qajettigine toqtaldy.
Aıta keteıik, «Mereıli otbasy» baıqaýynyń fınaldyq kezeńinde elimizdiń barlyq azamattary kaztube.kz saıtynda jáne sms habarlamalar arqyly daýys berý arqyly jeńimpazdardy anyqtaýǵa atsalysa alady. 16 qyrkúıek kúni «Qazaqstan» ortalyq konsert zalynda ótetin saltanatty rásimde daýys berý qorytyndysy shyǵarylyp, jeńimpaz otbasy anyqtalady.
Aıgúl SEIIL, «Egemen Qazaqstan»
Sýretti túsirgen Erlan OMAR, «Egemen Qazaqstan»