Almatyda jalpy aýdany 39 myń sharshy metr bolatyn jeńil atletıkaǵa arnalǵan sý jańa stadıon boı kóterdi. Sáýletti nysan qalanyń Alataý aýdany aýmaǵyndaǵy «Almaty Arena» sport saraıynyń mańynda ornalasqan. Bul sońǵy 40 jyl ishinde salynǵan alǵashqy jeńil atletıkaǵa arnalǵan jattyǵý stadıony.
Jańa stadıonda sportshylar jeńil atletıkanyń 47 dıssıplınasy boıynsha jattyǵýǵa bolady. Nysan 6 júgirý joly, ákimshilik ǵımaraty, 100, 400 metrlik júgirý joldarymen qatar, kólemi 100h70 jasandy fýtbol alańy, bıiktikke jáne uzyndyqqa sekirý alańdarymen, sonymen qatar, kólemi 100h62 metr tabıǵı shóppen jabylǵan ıadro, dısk, naıza, sharbalǵa laqtyrýǵa arnalǵan aımaqpen jasaqtalǵan.
Alańnyń saltanatty ashylý rásimine Almaty qalasynyń ákimi Baýyrjan Baıbek, demeýshiler, sondaı-aq, eńbegi sińgen sportshylar men bapkerler jáne Olımpıada oıyndarynyń júldegerleri Olga Rypakova, Dáýlet Turlyhanov, Islam Baıramýkov, Ermahan Ibraımov, Bahtııar Artaev pen Ámın Tuıaqovtar qatysty. Qala basshysy almatylyqtardy jeńil atletıka stadıonynyń ashylýymen quttyqtap, JShS «Alons» jáne «Iýnıkom» kompanııalaryna alyp shahar sportshylaryna stadıondy salyp, memleketke syıǵa tartqany úshin alǵysyn bildirdi.
– Bul sońǵy 40 jyl ishinde salynǵan alǵashqy jeńil atletıkalyq jattyǵý stadıony. Elbasy Nursultan Ábishuly Nazarbaevtyń «Rýhanı jańǵyrý» baǵdarlamasyn iske asyrý aıasynda «Alons» jáne «Iýnıkom bıznes grýpp» kompanııalary 605 mln teńge qarjyǵa salyp, memleketke syıǵa tartyp otyr. Stadıon Almaty qalasy jeńil atletteriniń jattyǵý ortalyǵyna aınalmaq. Aldaǵy ýaqytta, «Halyq Arena» janynda taǵy da 5 myń orynǵa arnalǵan halyqaralyq birinshi sanatty jeńil atletıka manejin salatyn bolamyz.Búgin biz ashyp otyrǵan jańa jattyǵý alańy jeńil atletıkanyń qarqyndy damýyna, elimizdiń týyn bıikke jelbiretetin sportshylardy daıyndaýǵa qyzmet etetin bolady dep senemin, – dedi Baýyrjan Baıbek.
– Jeńil atletterge arnalǵan stadıonnyń ashylǵanyna qýanyshtymyn. Mundaı ashylý jaqsy dástúrge aınalyp, barlyq qalalarda osy sport túriniń sportshylaryna arnalǵan sporttyq nysandar ashylsa eken deımin. Munda sportshylar jattyǵyp, óz maqsattaryna qol jetkizýge, ıaǵnı chempıon atanýǵa múmkindikteri barshylyq. Álbette, barlyǵy chempıon bola bermeıdi, bizdiń basty baılyǵymyz – densaýlyǵymyz, - dep atap ótti ashylý rásiminde arnaıy sóz alǵan Olımpıada jeńimpazy Olga Rypakova.
Almaty qalasynyń jeńil atletıka Federasııasynyń prezıdenti Muhıt Ázirbaevtyń aıtýynsha, stadıonda sporttyq mektep tárbıelenýshileri, jeńil atletıka áýesqoılary jattyǵa alady. Ol aldaǵy ýaqytta munda kóptegen qalalyq jarystar ótkiziletinin de tilge tıek etti. Aıta keter jaıt, stadıon bas merdiger JShS «Alons» pen Almaty qalasy ákimdiginiń qoldaýymen salyndy.
Arman OKTIаBR,
«Egemen Qazaqstan»
ALMATY