Quqyqtyq statıstıka jáne arnaıy esepke alý jónindegi komıteti oblystyq basqarmasy ótkizgen jıynda quqyqtyq qyzmet kórsetý ortalyǵyna arnalǵan ǵımarattyń jýyq arada qoldanysqa beriletinin, elektrondy júıemen tolyq jabdyqtalatynyn málimdeldi.
«Onda porkýratýra, ádilet, ishki ister organdarynyń ókilderi men medıatorlar ortalyqtandyrylǵan ádispen jumys istep, quqyqtyq máseleler boıynsha keńester beredi», dedi basqarma bastyǵynyń orynbasary Mahabbat Káribaıqyzy.
Sonymen qatar «Elektrondyq qylmystyq is» pılottyq jobasy tanystyryldy. Munda ótinish jazylǵannan bastap úkim shyqqanǵa deıingi barlyq materıaldar elektrondy túrde saqtalady. Qanatqaqty joba tergeý jumystarynyń merzimin qysqartyp istiń sapasyn arttyryp, qujattardyń qaýipsizdigin qamtamasyz etetin bolady. Sondaı-aq «Elektrondyq ákimshilik is» mobıldik qosymshasy da qyzmet kórsetedi.
Bólim jetekshisi Aıdar Muqanovtyń aıtýynsha ákimshilik zań buzýshylyqtardy tirkeıtin biryńǵaı baza arqyly polısııa qyzmetkerleri hattamany oqıǵa ornynda da toltyra alady. Zań buzýshy sol jerde tólem kartasy arqyly aıyppuldy tóleýge múmkindik alady.
Jıynda tergeýshilerdiń azamattardy qylmystyq isti tergeý barysyna qatystyrý úshin jylyna shamamen 2 mıllıonǵa jýyq shaqyrtý jóneltiletini mysalǵa keltirildi. Endi qaǵazbastylyqtan arylý úshin arnaıy qujattar SMS arqyly jiberiletin bolady.
О́mir Esqalı,
«Egemen Qazaqstan»
Soltústik Qazaqstan oblysy