«Vılıarreal» fýtbol klýbynyń jartylaı qorǵaýshysy Maný Trıgeros Eýropa lıgasyndaǵy «Astanaǵa» qarsy oıyn jaıly oı bólisti.
- «Astana» osyǵan deıin «Vılıarrealmen» kezdesti. Sizdiń oıyńyzsha, qazaqstandyqtar osy ýaqyt aralyǵynda kúsheıe tústi me?
- Úsh jyl buryn dál osy «Astanaǵa» qarsy oınaǵan bolatynmyn. Iá, qazaqstandyqtar osy ýaqyt aralyǵynda kúsheıe túsip, eýropalyq deńgeıge jetti dep oılaımyn. Sebebi, Chempıondar lıgasy men Eýropa lıgasynyń toptyq kezeńinde óner kórsetip úlgerdi.
- «Vılıarreal» maýsymdy sátsiz bastady. Sondyqtan jankúıerlerdiń endigi tek jeńisterdi kútetini belgili. Bul sizderge qıyndyq týdyrmaı ma?
- Sońǵy oıynda «Betısti» jeńgen bolatynbyz. Olardyń mundaı talaby oryndy, sondyqtan «Astanany» jeńýimiz kerek. Sebebi, óz jankúıerlerimizdiń aldynda óner kórsetemiz. Tıisti nátıjege jetý úshin aıanyp qalmaıtynymyz anyq.
- Sońǵy maýsymdarda eýrokýboktyq oıyndarda joldaryńyz bolmaı júr. Al erteńgi match...
- Shyny kerek, sońǵy jyldary Eýropadaǵy jeńisterimiz ońaı bolmaı júr. Erteńgi oıyn da bizge jeńil bolmaıtyny belgili. Biraq jeńiske jetkimiz keledi. Osy maqsatymyzǵa jetý úshin barymyzdy salamyz.
- Erteńgi oıyn sizder úshin oıdaǵydaı aıaqtalar bolsa...
- Árıne, jeńisten bárimiz úmittimiz. Biraq bul nátıjeniń kimge de bolsyn ońaı kelmesi anyq. Biraq óz alańymyzda oınaý, jankúıerimizdiń qoldaýy bizge kómek bolmaq. Erteń shabýylǵa neǵurlym kóbirek kóńil bólýimiz kerek.
- «Astana» sapynan kimdi erekshe atap óter edińiz?
- Shynymdy aıtsam, «Astananyń» oıynshylary jaıly kóp bilmeımin. Erteń alańǵa shyqqannan keıin bári belgili bolady. Sol kezde kimge qarsy oınaý qıyn bolatynyn biletin bolamyn. Al ózim komandama kómektesý úshin barymdy salarym anyq.
- «Vılıarreal» maýsymdy óte aýyr bastady. Alaıda, sońǵy oıynda «Betıske» soqqan golyńyz komandany artyq qıyndyqtan qutqardy dep oılaısyz ba?
- Ujymda bárimiz tek jeńisti ǵana maqsat tuttyq. Jankúıer qaýymnyń bizden jeńis kútýi bir jaǵynan artyq qysym boldy dep te aıtýǵa bolady. Biraq ekinshi jaǵynan olardyń qoldaýyn da sezine bildik. Negizi múmkindikterimiz kóp bolǵan, tek sáttilik jetispeı jatty. Degenmen, túptiń túbinde úsh gol salyp, maqsatymyzǵa jettik.
- Trıbýnada otyrǵan jandardyń qoldaýy qanshalyqty ról atqarady dep oılaısyz?
- Match kezinde stadıonymyzdyń tynysh bolǵany esimde joq. Trıbýnada otyrǵandar bizdi ylǵı da qoldaıdy. Al olardyń nıeti, tilegen tileýleri bizdiń jeńisimizge úlken septigin tıgizedi.
Aıan ÁBDÝÁLI, «Egemen Qazaqstan»