Jaqynda Májiliste elimizdiń basty qarjylyq qujatynyń jobasy tanystyryldy. 2018-2020 jyldarǵa arnalǵan respýblıkalyq bıýdjet, osy jyldarǵa Ulttyq qordan bólinetin kepildendirilgen transfert jáne bıýdjet zańnamasyn jetildirý máseleleri týraly zań jobalary boıynsha Qarjy mınıstri Baqyt Sultanov pen Ulttyq ekonomıka mınıstri Tımýr Súleımenov baıandady.
Qarjy mınıstri bıýdjet túsimderi qurylymynyń sapaly ózgerýi; munaı túsimderiniń 1902,3 mlrd teńgege azaıýy; munaılyq emes túsimderdiń 852 mlrd teńgege ósýi kózdelgenin jetkizdi. Ulttyq qordyń qarajatyn qalyptastyrýdyń jáne paıdalanýdyń jańa tujyrymdamasyna sáıkes kepildendirilgen transfert mólsheri 2018 jylǵy 2,6 trln teńgeden 2020 jyly 2 trln teńgege deıin tómendeıtin bolady.
Respýblıkalyq bıýdjet shyǵystary 2018 jylǵa 9 217,9 mlrd teńge, 2019 jylǵa 9798,2 mlrd teńge, 2020 jylǵa 10219,7 mlrd teńge kóleminde josparlanyp otyr. Bıýdjet jobasy áleýmettik baǵytty saqtaıdy. Áleýmettik bloktyń shyǵystary 2018 jyly 4101,3 mlrd teńgeni nemese shyǵystardyń jalpy kóleminiń 44,5 %-yn quraıdy.
Úsh jyldyq kezeńde ekonomıkalyq ósýdiń jańa modelin qurý boıynsha mindetterdi iske asyrý – ekonomıkany tehnologııalyq jańǵyrtý jáne sıfrlandyrý, kásipkerlikti jappaı qoldaý, sondaı-aq dástúrli bazalyq salalardy – agrarlyq sektordy, kólik jáne logıstıka ınfraqurylymyn damytý arqyly júzege asyrylatyn bolady.
Bıýdjet tapshylyǵy 2019 jyly ishki jalpy ónimniń 1 %-na deıin birtindep tómendeıtin bolady.
Qarjy mınıstriniń aıtýynsha ishki jalpy ónimniń naqty ósýi 2022 jyly 4,2%-ǵa, 2018 jyly 3,1% deńgeıinde boljanýda. 2018 jyly nomınaldy jalpy ishki ónim 55 906,2 mlrd teńgeden 2022 jyly 75 875,4 mlrd teńgege deıin ósedi. Jan basyna shaqqandaǵy ishki jalpy ónim 2018 jyly 9,0 myń AQSh dollaryn qurap, 2022 jyly 11,7 myń AQSh dollaryna deıin ulǵaıady.
Munaı óndirý kólemi 2018 jylǵy 86 mln tonnadan 2022 jyly 88,6 mln tonnaǵa deıin ulǵaıady. Eksport 2018 jylǵy 47,5 mlrd dollardan 2022 jyly 60,6 mlrd-qa deıin, al ımport 2018 jylǵy 34,0 mlrd AQSh dollarynan 2022 jyly 45,5 mlrd AQSh dollaryna deıin ósedi. Ulttyq bank ınflıasııanyń jyldyq maqsatty dálizin 2018 jylǵy 5,0-7,0%-dan 2019 jyly 4,0-6,0%, al 2020-2022 jyldary 3,0-4,0%-ǵa deıin tómendeý boljanǵan.
Ulttyq ekonomıka mınıstri Tımýr Súleımenov Ulttyq qor qarajatyn qalyptastyrýdyń jáne paıdalanýdyń jańa tujyrymdamasyna sáıkes Ulttyq qordan respýblıkalyq bıýdjetke beriletin kepildendirilgen transfert 2018 jyly – 2 trln 600 mlrd teńge, 2019 jyly – 2 trln 300 mlrd teńge, 2020 jyly – 2 trln teńge kóleminde aıqyndalǵanyn aıtty.
«Qazaqstan Respýblıkasynyń Ulttyq qorynan 2018-2020 jyldarǵa arnalǵan kepildendirilgen transfert týraly» zań jobasy engizildi. Ol ortalyq jáne jergilikti deńgeılerde 1,5 myńnan astam qujatty qysqartýdy, ortalyq jáne jergilikti deńgeılerde bıýdjettik baǵdarlamalardy iske asyrýda derbestikti keńeıtýdi kózdeıdi.
Májilistegi tanystyrylym Qarjy jáne bıýdjet komıtetiniń otyrysy sheńberinde ótti. Bıýdjettik zań jobalarynyń odan arǵy talqylaýlary osy komıtettiń músheleri Sergeı Sımonov pen Omarhan О́ksikbaev bastaıtyn jumys toptarynda ótetin bolady.
«Egemen-aqparat»