Qazaq ǵylymyn damytýǵa sanaly ǵumyryn arnaǵan belgili ǵalym, memleket jáne qoǵam qaıratkeri Áshimjan Ahmetov ortamyzdan erte ozsa da, eldiktiń jolyndaǵy eren eńbegi esh umytylmaq emes. Qaıratkerdiń ómir kerýenine kóz júgirter bolsaq, Joǵarǵy Keńestiń depýtaty, О́nerkásip, energetıka, transport jáne baılanys jónindegi komıtetiniń tóraǵasy (1994-1995), О́nerkásip jáne saýda mınıstriniń orynbasary, Májilis depýtaty, Ekologııa jáne tabıǵatty paıdalaný máseleleri boıynsha komıtetiniń tóraǵasy (1996-1999), Bilim jáne ǵylym vıse-mınıstri (1999-2001) qyzmetterin atqarsa, 2001-2005 jyldary Sh.Esenov atyndaǵy Aqtaý memlekettik ýnıversıtetiniń, 2005-2006 jyldary S.Amanjolov atyndaǵy Shyǵys Qazaqstan memlekettik ýnıversıtetiniń, 2006-2008 jyldary Prezıdent janyndaǵy Memlekettik qyzmet akademııasynyń, 2008-2012 jyldary H.Dýlatı atyndaǵy Taraz memlekettik ýnıversıtetiniń rektory bolyp eńbek etti.
Tehnıka ǵylymdarynyń doktory, professor, Qazaqstan Ulttyq ınjenerlik jáne Joǵary mektep akademııalarynyń akademıgi Áshimjan Súleımenulynyń Sh.Esenov atyndaǵy Aqtaý memlekettik ýnıversıtetindegi rektorlyq qyzmetine toqtalýdy jón kórdim. Sebebi ózim de sol ýnıversıtettiń rektory qyzmetin atqarǵan edim. Tájirıbeli uıymdastyrýshy Á.Ahmetov 2001 jyly atalǵan ýnıversıtettiń rektory bolyp taǵaıyndalady.
Ol kisiniń basshylyqqa kelýimen ýnıversıtette kúrdeli qurylymdyq ózgerister bastaldy. Ýnıversıtettiń materıaldyq-tehnıkalyq bazasy jaqsardy. Joǵary oqý orny óziniń shırek ǵasyrlyq tarıhynda jańa beleske kóterildi. Ǵımarattary jóndeýden ótip, jańa keıipke keltirildi, qurylystar salyndy. О́ńirdegi orny aıqyndala, bedeli arta tústi. Jańa sapalyq deńgeıge kóterilip, zamanaýı joǵary oqý orny mártebesine qadam jasady. Elimizdiń batys óńirindegi oqý-tárbıe úderisin uıymdastyrýdyń sony talaptaryna sáıkes keletin eń iri joǵary oqý orny retinde qalyptasty.
Elbasynyń «Qazaqstan-2030» Strategııasyna sáıkes, ýnıversıtettiń ǵylymı keńesinde 2002-2007 jyldarǵa arnalǵan damý tujyrymdamasy qabyldandy jáne 2004-2007 jyldarǵa arnalǵan damý jospary jasaqtaldy. Ujym jumysy memlekettik baǵdarlamada, tujyrymdamada jáne jyl saıynǵy Elbasy Joldaýlarynda kórsetilgen maqsattarǵa qol jetkizýge baǵyttaldy. Oqý men basqarý úderisine jańa aqparattyq tehnologııalar engizýge erekshe kóńil bólindi. Qashyqtyqtan oqytý ortalyǵynyń jumysy jolǵa qoıyla bastady. Sońǵy modeldegi kompıýter men ınternet synyptary ashyldy. Sondaı-aq sharýashylyq kelisimshart jumystary oryndala bastady. Negizgi tapsyrys berýshiler munaı kompanııalary, ónerkásipter men uıymdar boldy.
Osylaısha, 2006 jyly 30 jyldyq mereıtoıy qarsańynda Sh.Esenov atyndaǵy Aqtaý memlekettik ýnıversıteti oqý-tárbıe jumysynyń uıymdastyrylýy jolǵa qoıylǵan qýatty ǵylymı-bilim berý qurylymy retinde qalyptasty. Aldyna óńir ónerkásibi men ekonomıkasyn joǵary bilikti kadrlarmen qamtamasyz etý maqsatyn qoıyp, jas urpaqtyń jol tabýyna jan-jaqty kómektesýge baǵyt ustanǵan edi.
El aǵasy atanǵan Áshimjan Súleımenuly qaı kyzmetti atqarsa da árkez Qazaqstannyń ǵylymy men bilimin damytýǵa atsalysqan jan. Ol ultymyzdyń órkenıetti elder qatarynan oryn alýyn tileıtin jáne oǵan tek tereń bilim arqyly jete alatynymyzdy únemi tilge tıek etetin. Búginde Sh.Esenov atyndaǵy Aqtaý memlekettik ýnıversıtetinde Áshimjan Súleımenuly atyndaǵy zamanaýı oqý aýdıtorııasy bar. Bul aýdıtorııa stýdent jastardyń bilimin shyńdaýǵa qyzmet etip keledi. «Jaqsynyń aty, ǵalymnyń haty ólmeıdi» degende, el aldyndaǵy osyndaı eresen eńbek eske túsedi.
Ábdimútálip ÁBJAPPAROV, Sh.Ýálıhanov atyndaǵy Kókshetaý memlekettik ýnıversıtetiniń rektory, tehnıka ǵylymdarynyń doktory, professor KО́KShETAÝ