1916 jylǵy ult-azattyq kóterilis qolbasshylarynyń biri Keıki (Nurmaǵambet) Kókembaıulyna Aralyq – Torǵaı tas jolynyń boıynda ornatylgan kesenege batyrdyń bas súıegi jerlendi, sonymen qatar ol qaza tapqan Jalaýlydan topyraq ákelip salyndy.
Bas súıekti jerleý rásimine Memlekettik hatshy Gúlshara Ábdiqalyqova, Mádenıet jáne sport mınıstri Arystanbek Muhamedıuly, Vengrııanyń Qazaqstandaǵy elshisi Andrash Baranı, belgili jazýshy Sabıt Dosanov, Parlament depýtattary, jazýshylar jáne batyrdyń arýaǵyn qurmettegen jurtshylyq ókilderi men urpaqtary qatysty.
Batyr súıegin jerleýdi rásimdeýge arnalǵan mıtıngide memlekettik hatshy Gúlshara Ábdiqalyqova sóz sóılep, Keıki esimin ulaǵattaý Táýelsizdik jemisi ekenin aıtty. "Elimizdi, jerimizdi qorǵaǵan talaı batyrlarymyzdyń esimi tarıhymyzda altyn árippen jazylyp qaldy. Solardyń arasynda ataqty mergen, sardar Keıki batyrdyń orny erekshe. Onyń esimin ulyqtap jatqan búgingi sharanyń da tarıhı mańyzy erekshe", dedi Gúlshara Ábdiqalyqova.
Sondaı-aq Keıki arýaǵyna arnap as berilip, quran baǵyshtaldy. Munan keıin "Keıki batyrdyń ómiri men óliminiń jumbaǵy" atty ǵylymı-tájirıbelik konferensııa, at jarysy, konsert bastaldy. Olardyń qorytyndysy týraly taǵy da habarlaıtyn bolamyz.
Názıra Járimbet,
"Egemen Qazaqstan"
Qostanaı oblysy,
Amangeldi aýdany.