Túrikmenstan Prezıdenti Gýrbangýly Berdimuhamedov Qazaqstan Prezıdentin Ashhabatta ótip jatqan Azııa oıyndarynyń ashylýyna qurmetti qonaq retinde qatysýǵa arnaıy shaqyrǵan bolatyn. Túrikmenstan Prezıdenti shaqyrýyn qabyl alyp, qonaqjaı túrikmen jerine kelgeni úshin Nursultan Nazarbaevqa alǵys bildirdi.
– Bul – Ortalyq Azııa óńiriniń barlyq elderine ortaq mereke. Bul – bizdiń nıettestigimiz ben aýyzbirshiligimizdiń kórsetkishi. Osy oıyndarǵa 64 eldiń ókilderi qatysyp otyr, sondaı-aq Birikken Ulttar Uıymynyń ótinishi boıynsha 65-shi el retinde bosqyndardan turatyn qurama qatysýda. Olar osy oıyndardyń týyn ustap synǵa túsedi, – dedi Gýrbangýly Berdimuhamedov. Túrikmenstan kóshbasshysy Astanadaǵy halyqaralyq «EKSPO-2017» mamandandyrylǵan kórmesiniń joǵary deńgeıde uıymdastyrylǵany ózine umytylmas áser qaldyrǵanyn erekshe atap ótti. Qazaqstan Prezıdenti jaýyngerlik óner túrleri boıynsha jabyq ǵımaratta ótetin V Azııa oıyndarynyń ashylý rásimine qatysýǵa shaqyrǵany úshin Gýrbangýly Berdimuhamedovke rızashylyq bildirip, osyndaı is-sharalardy ótkizýdiń mańyzdy ekenin aıtty. – Men Sizdi osy Azııa oıyndarynyń ótýimen quttyqtaımyn. Kóptegen sport nysandary salyndy, aldaǵy ýaqytta olar halyqtyń ıgiligine qyzmet etetin bolady. Mundaı is-sharalar arqyly Túrikmenstannyń álemge tanymaldyǵy arta túsedi. Bıyl Qazaqstan da aýqymdy sport saıysyn – 28-shi Dúnıejúzilik qysqy ýnıversıadany ótkizdi. Jalpy, bizdiń óńirde iri halyqaralyq is-sharalardy ótkizý óte mańyzdy, – dedi Nursultan Nazarbaev. Memleket basshysy kórshiles Túrikmenstanmen baýyrlas qarym-qatynastarymyzdy atap ótip, ekijaqty yntymaqtastyqty odan ári damytý qajettigine toqtaldy. – Sizdiń Qazaqstanǵa jasaǵan saparyńyzdan keıin kóp nárse jasaldy, memleketaralyq komıssııa jumys júrgizýde. Bizdiń ekonomıka salasyndaǵy perspektıvamyz jaqsy dep oılamyn. Men sizderge О́zbekstannan keldim, onda memlekettik saparmen boldym. Kóp másele sheshimin tapty: shekaraaralyq yntymaqtastyq, aksızder, salyq, tasymaldaý salasyndaǵy tarıfter. Qazaqstan men О́zbekstan arasyndaǵy saýda birden artqany baıqalady. Bıyl ol 35 paıyzǵa ósti. Men elderimiz arasyndaǵy qarym-qatynastar da osylaısha keńeıe túsedi dep úmittenemin, – dedi Memleket basshysy. Sońynda Qazaqstan Prezıdenti Túrikmenstan halqyna jáne Túrikmenstan Prezıdentine, sondaı-aq oıyndarǵa qatysýǵa kelgen sportshylarǵa tabys tiledi.
Dınara BITIK,
«Egemen Qazaqstan»,
Ashhabattan